Արցախյան խնդիրն առնչություն չունի Կատալոնիայի, Ղրիմի կամ Հր.Օսիայի խնդրի հետ. Շարմազանով

Արցախյան խնդիրն առնչություն չունի ո՛չ կատալոնական, ո՛չ Ղրիմի, ոչ էլ Հարավային Օսիայի խնդիրների հետ: Այս մասին ՀՀ և Արցախի խորհրդարանների միջև համագործակցության միջխորհրդարանական հանձնաժողովի 12-րդ նիստի ժամանակ հայտարարել է ՀՀ ԱԺ փոխնախագահ Էդուարդ Շարմազանովը:

Նրա խոսքով, ղարաբաղյան հակամարտությունը բոլորովին այլ խնդիր է: և հայկական կողմի հիմնական խնդիրը հենց դա է՝  բոլոր հարթակներում հասկացնել, որ Արցախի Հանրապետությունը ԽՍՀՄ-ից անջատվել է նույն այն օրենսդրական նորմերով, ինչ 15 միութենական հանրապետությունները:

«Եթե ոմանք կարծում են, որ Արցախի անկախությունն օրինական չէ, ուրեմն օրինական չէ ո՛չ Լատվիայի, ո՛չ Լիտվայի, ո՛չ Էստոնիայի անկախությունները: Հատկապես այս երեք պետությունները ԵՄ անդամներ են և հետո նրանք ԽՍՀՄ-ից անօրինական են անջատվել»,- հայտարարել է Շարմազանովը: 

ԱԺ փոխնախագահը նշել է նաև, որ Արցախի և Ադրբեջանի քաղաքական, արժեքային իրավիճակները լրիվ անհամեմատելի են և եթե Բաքուն գնում է դեպի խորը տոտալիտարիզմ, ապա Արցախի ճանապարհը դեպի ժողովրդավարությունն է:  

«Արցախի հարցն այն հարցն է, որտեղ բոլորը միակարծիք են՝ անկախ իրենց կուսակցական պատկանելությունից: Արցախի անկախությանն այլընտրանք չկա»,- հավելել է Շարմազանովը: