Ռասմունսենը հիմարի տեղ է դրել Հայաստանում իրեն լսողներին

«Ավելին, կարծում եմ, որ համաձայնագրի ստորագրումը բխում է Ադրբեջանի շահերից, որովհետև դա կհեշտացնի Ադրբեջանի կապերի զարգացումը միջազգային հանրության, միջազգային ճանապարհների վրա»: Գիտե՞ք սա ով է ասում: Սա ասում է ՆԱՏՕ նախկին գլխավոր քարտուղար Անդրես Ֆոգ Ռասմունսենը: Նա հիմա ունի խորհրդատվական կազմակերպություն՝ Ռասմունսեն գլոբալ, որի հետ տեւական ժամանակ է աշխատում է Հայաստանը: Դե, հասկանալի է, Ռասմունսենի կազմակերպությունը խորհրդատվական է, ոչ թե բարեգործական:

Ռասմունսենը դարձյալ ժամանել է Հայաստան: Հիշեցնեմ, նա 2023-ին էլ ժամանել էր, եւ անգամ լուսանկարվել Լաչինի փակված միջանցքի արգելափակոցի ֆոնին: Թե այդ առնչությամբ ինչ խորհուրդներ է տվել Ռասմունսենը Հայաստանին, չգիտեմ, բայց հետո գիտենք, թե ինչպես է զարգացել իրադարձությունը:

Հիմա, այս մարդը եկել է Հայաստան ու այստեղից Ադրբեջանին բացատրում է, որ, եթե Բաքուն ստորագրի պայմանագիրը, ապա դա համապատասխանում է նաեւ Ադրբեջանի շահերին, քանի որ կհեշտացնի միջազգային կապերը:

Եթե Ռասմունսենը Բաքվում գտնվողներին է հիմարի տեղ դրել, դա իհարկե իր ու Բաքվի գործն է, բայց, մեղմ ասած տպավորություն է, որ նա հիմարի տեղ է դրել Հայաստանում իրեն լսողներին:

Անկասկած է, որ Հայաստանը պետք է աշխատի միջազգային խորհրդատվական ընկերությունների հետ, փորձելով նրանց միջոցով առաջ մղել իր շահերը, ձեւավորել իր համար կարեւոր օրակարգեր: Դա պրակտիկա է մեր տիպի թերեւս բոլոր երկրների պարագայում:

Բայց, ամբողջ հարցն այն է, թե ինչպես, ինչո՞վ է չափվում խորհրդատվական ծառայությունների արդյունավետությունը, որոնց համար Հայաստանը թերեւս քիչ փող չի վճարում: Չափվում է նրանով, որ դրանք մատուցող անձը գալիս է Հայաստան ու այստեղից Ադրբեջանին բացատրում է իր շահերը՞:

Քաղաքական մեկնաբան Հակոբ Բադալյան