Հայկական կոնյակի արտահանման հետ կապված խնդիրներ չկան. Գևորգ Պապոյան

Հայաստանի էկոնոմիկայի նախարար Գևորգ Պապոյանը հայտարարել է, որ այս պահին հայկական կոնյակի արտահանման և վաճառքի հետ կապված որևէ խնդիր չկա։ Օգոստոսի 22-ին լրագրողների հետ ճեպազրույցի ընթացքում նա նշեց, որ բիզնեսից որևէ ահազանգ չի ստացվել։

Պապոյանը նաև մեկնաբանել է ռուսական մամուլում հայկական կոնյակի հնարավոր խնդիրների մասին հրապարակումները՝ ընդգծելով, որ մինչև պաշտոնական պատասխանի ստացումը, այս հարցի քննարկումն անհարկի է։

Նախարարը հավելեց, որ 2025 թվականին Հայաստանում նախատեսվում է ստեղծել իզոտոպային լաբորատորիա, որը հնարավորություն կտա անհրաժեշտ ուսումնասիրություններն անցկացնել տեղում։ Ներկայումս բոլոր հայկական կոնյակները անցնում են իզոտոպային լաբորատոր հետազոտություններ Ռուսաստանում, առանց որոնց նրանց վաճառքը ռուսական շուկայում հնարավոր չէ։