Ռուսական կողմին նախապես տեղեկացրել ենք օգնություն ուղարկելու մասին. ԱԳ փոխնախարար

Արցախ հումանիտար բեռ ուղարկելու նախաձեռնության մասին հայկական կողմը տեղեկացրել էր ռուս խաղաղապահներին։ Այս մասին «Ազատություն» ռադիոկայանի հետ զրույցում ասել է Հայաստանի փոխարտգործնախարար Վահան Կոստանյանը։

«Այս պահին որևէ զարգացումներ, ցավոք սրտի, դրական զարգացումներ չկան։ Այնուամենայնիվ, հումանիտար բեռը, որը Հայաստանի Հանրապետությունը ցանկություն ունի ուղարկել Լեռնային Ղարաբաղ, որովհետև էնտեղ հումանիտար իրավիճակը իրապես շատ սուր է, շարունակում է գտնվել Լաչինի միջանցքի մուտքի մոտ։ Եվ մենք նախապես նաև տեղեկացրել էինք ռուս խաղաղապահներին, որը Հայաստանի Հանրապետության կառավարությունը նման ցանկություն ունի և նման նախաձեռնությամբ է հանդես գալու։ Դեռևս սպասում ենք զարգացումների։ Հուսով ենք, որ Ադրբեջանը ի կատար կածի նոյեմբերի 9-ի եռակողմ հայտարարության համապատասխան դրույթը և ՄԱԿ-ի միջազգային դատարանի փետրվարի 22-ի և հուլիսի 6-ի որոշումները, համաձայն որի Լաչինի միջանցքով երկկողմանի պիտի ապահովվի անխափան անցում մարդկանց, բեռների և մեքենաների համար» , - ասել է Կոստանյանը։

Հարցին, թե դա նախապես իրազեկո՞ւմ էր, տեղեկացո՞ւմ էր, թե՞ ձեռք էր բերվել պայմանավորվածություն։ Որովհետև դրանք տարբեր բաներ են, Վահան Կոստանյանը պատասխանել է. «Իրազեկում էր»։