Բրյուսելից առաջ շեղել հանրային օրակարգը՝ Փաշինյանի սիրելի ձեռագիրն է. պատգամավոր

Շեղել հանրային օրակարգը՝ սեփական ապիկար քաղաքականությունը քողարկելու համար: Սա Փաշինյանի սիրելի ձեռագիրն է: Այս մասին Facebook-ի իր էջում գրել է ԱԺ "Հայաստան" խմբակցության պատգամավոր Հռիփսիմե Ստամբուլյանը:

"Նախորդ շաբաթ ԱԺ ամբիոնից ընդդիմությանը իբր ձեռնոց էր նետում՝ «Դուք դեռ ոչ մի բառ չեք ասել, թե ինչպես ինքներդ կկանխեիք պատերազմը»: Այսինքն, դրդում էր իր հանցավոր անցյալը քննարկելու՝ իր ներկա գաղտնի պայմանավորվածություններին ուշադիր չլինելու և չարձագանքելու համար:

Եվ դա այն դեպքում, որ թե՛ պատերազմից առաջ, թե՛ պատերազմի ժամանակ, թե՛ պատերազմից հետո ընդդիմությունը և սրտացավ ու գիտակ այլ շրջանակներն անվերջ զգուշացրել են առկա մարտահրավերների, հնարավոր վտանգների մասին ու հուշել իրական անելիքները: Բայց իշխանությունը «կույր էր ու խուլ»:

Այսօր էլ նույն իրավիճակն ունենք՝ Բրյուսելում Ալիևի հետ հանդիպում, թուրքական կողմից արտահոսք, որ արդեն հայ-թուրքական բանակցությունների համար բանագնացներ են նշանակվում... իսկ իշխանությունն էժանագին մասկիշոուներ է կազմակերպում, քաղակտիվիստների ձերբակալում: Եվ կրկին մեկ նպատակով՝ շեղել հանրության ուշադրությունը",- գրել է պատգամավորը:

Հիշեցնենք, այսօր ձերբակալվել է "Քաղաքացիական գիտակցություն" հասարակական կազմակերպության նախագահ Նարեկ Սամսոնյանը: Ավելի ուշ իրեն ձերբակալելու մասին որոշում կայացնելու մասին հայտնեց նաև սուր ընդդիմադիր հայացքներով աչքի ընկնող ակտիվիստ Նարեկ Մանթաշյանը: