Երևանում «Դոմ Մոսկվի» մոսկովյան մշակութագործարարական կենտրոնի նախաձեռնությամբ Մեղրիում տեղի ունեցավ 10-րդ ռուսական կենտրոնի բացումը: Կարմիր ժապավենը կտրեցին ՌԴ նախագահի արտասահմանյան երկրների հետ միջտարածաշրջանային և մշակութային կապերի վարչության պետ Իգոր Մասլովը և Մեղրիի քաղաքապետ Բագրատ Զաքարյանը:Նախագիծն իրականացվել է ՌԴ նախագահի աշխատակազմի, Մեղրիի քաղաքապետարանի և Զանգեզուրի պղնձամոլիբդենային կոմբինատի աջակցությամբ:Մեղրիում «Դոմ Մոսկվի» կենտրոնի ռուսերենի անվճար դասընթացների սաները պատրաստել էին ելույթ, որի ընթացքում կատարեցին հայկական և ռուսական ժողովրդական պարեր, երգեր ու բանաստեղծություններ:«Ռուսական կենտրոնի բացումը կարևոր իրադարձություն է բոլորիս համար։ Նման կենտրոնները լրացուցիչ հնարավորություն են բարելավելու ռուսաց լեզվի գիտելիքները։ Ռուսերենի իմացությունը լայն հնարավորություններ էբացում հետագա մասնագիտության ընտրության գործում։ Այս համատեքստում կենտրոնները կարևոր դեր են խաղում նաև Հայաստանի և Ռուսաստանի միջև կրթամշակութային երկխոսության ընդլայնման գործում»,նշեց ՌԴ նախագահի արտասահմանյան երկրների հետ միջտարածաշրջանային և մշակութային կապերի վարչության պետ Իգոր Մասլովը։ՌԴ Նախագահի աշխատակազմը նորաբաց կենտրոնին նվիրեց 3D տպիչ, որը կօգնի կրթական գործընթացն ավելի հետաքրքիր դարձնել և երեխաների մոտ զարգացնել ստեղծագործ մտածողությունը:«Ուրախ եմ ներկա գտնվել 10-րդ հոբելյանական ռուսական կենտրոնի բացմանը։ Ռուսաստանի մշակութային և հումանիտար ներկայությունն ապահովում են նաև ռուսական կենտրոնները։ Ի վերջո, ռուսաց լեզվիուսումնասիրությունը հնարավորություն է տալիս հետագայում ընդունվել ռուսական համալսարաններ: Ամեն տարի Ռուսաստանը հարյուրավոր տեղեր է հատկացնում հայ շրջանավարտներին, որպեսզի նրանք սովորեն, մասնագիտություն ստանան և վերադառնան Հայաստան: Այդ գործում իրենց ներդրումն են ունենում նաև Երևանում «Դոմ Մոսկվի» կենտրոնի կողմից բացված ռուսական կենտրոնները», – նշեց Ռուսաստանի դեսպանատան խորհրդական-դեսպանորդ Մաքսիմ Սելեզնյովը։Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը ներկայացրեց Հայաստանի 8 մարզերում բացված ռուսական կենտրոնների գործունեությունը, որոնք ուղղված է ռուսական մշակույթի, պատմության և լեզվի ներկայացմանն ու հանրահռչակմանը: Բացի ռուսաց լեզվի անվճար դասընթացներից, կենտրոններում անցկացվում են լրացուցիչ կրթության դասընթացներ, որոնց շնորհիվ երեխաները ծանոթանում են ռոբոտաշինության հիմունքներին, սովորում են ֆինանսական գրագիտություն և նկարահանում են իրենց առաջին անիմացիոն ֆիլմերը: Կենտրոնի հարուստգրադարանի շնորհիվ քաղաքացիները կարող են ուսումնասիրել ռուս գրողների ստեղծագործությունները, հետաքրքիր փաստեր իմանալ Ռուսաստանի և Մոսկվայի մասին:«Հայաստանի մարզերում բացված ռուսական կենտրոնների միջոցով «Դոմ Մոսկվի»-ին ջանում է իր լուման ներդնել մեր երկրների և ժողովուրդների միջև կրթամշակութային երկխոսության զարգացման գործում։ Մենք գիտակցում ենք, որ գրագետ, կիրթ սերունդը երկրի զարգացման ու բարգավաճման երաշխավորն է: Վստահ ենք, որ երեխաներին արժանապատիվ կրթություն տալով՝ ապագայում կունենանք ավելի զարգացած և առաջադեմ հասարակություն», - նշեց Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը։Երևանում «Դոմ Մոսկվի» կենտրոնը մշտապես աջակցում է ուսուցիչներին՝ ցուցաբերելով մեթոդական աջակցություն և կազմակերպելով սեմինարներ և վերապատրաստման դասընթացներ։ Միջոցառման շրջանակում տեղի ունեցավ նաև ռուսաց լեզվի անվճար դասընթացների շրջանավարտներին հավաստագրերի հանձնման արարողությունը: Կենտրոնի նախասրահում բացվեց նաև «Մոսկվան պարզապես քաղաք չէ» լուսանկարչական ցուցահանդեսը։