ՀՀ արտաքին գործերի նախարարությունը նախօրեին Տավուշի մարզի ուղղությամբ ադրբեջանական կողմից կատարած կրակոցների մասին տեղեկացրել է ԵԱՀԿ Մինսկի խմբի համանախագահներին: Այս մասին ավանդական ճեպազրույցի ժամանակ լրագրողներին տեղեկացրեց ՀՀ ԱԳՆ մամուլի խոսնակ Տիգրան Բալայանը: Նա նշեց, որ նման իրավիճակներում հայկական կողմի գործողությունների մեխանիզմը հստակ է. «Առաջին հերթին տեղյակ են պահվում ԵԱՀԿ Մինսկի խմբի համանախագահ երկրների ԱԳՆ-ներն ու դեսպանները, ապա ԵԱՀԿ գործող նախագահի անձնական ներկայացուցիչը, որ հերթական կոպտագույն խախտումն է եղել ադրբեջանական կողմից: Ադրբեջանական ոտնձգությունները շարունակական բնույթ են կրում, ինչը նրանց ապակառուցողական կեցվածքի հետևանքն է»,- ասաց նա: Բալայանը նաև նշեց, որ Ադրբեջանը շարունակ մերժում է իրականացնել Վիեննայում, Սանկտ Պետերբուրգում և Ժնևում ձեռք բերված և վերահաստատված համաձայնությունները: Նշենք, երեկոյան ժամը 22.30-ին շուրջ 10 րոպե ադրբեջանական զինուժը հրաձգային խոշոր զենքերից գնդակոծել է Տավուշի մարզի Բաղանիս գյուղը և գյուղով անցնող միջպետական ավտոճանապարհը:
