Փոխվարչապետ Մհեր Գրիգորյանն ընդունել է Հայաստանում Իրանի Իսլամական Հանրապետության նորանշանակ դեսպան Մեհդի Սոբհանիին: Այս մասին հայտնում են ՀՀ կառավարությունից: Հանդիպման սկզբում փոխվարչապետ Մհեր Գրիգորյանը շնորհավորել է դեսպանին նշանակման կապակցությամբ՝ կարեւորելով նման փորձառություն ունեցող դիվանագետի նշանակումը՝ ի նպաստ երկու երկրների հարաբերությունների հետագա զարգացման: Զրուցակիցները քննարկել են հայ-իրանական հարաբերությունների օրակարգի առանցքային հարցերը, անդրադարձել առեւտրատնտեսական եւ էներգետիկ ոլորտներում համագործակցության հեռանկարներին: Երկուստեք կարեւորվել է ս.թ. օգոստոսի 10-ին «Գազ` էլեկտրաէներգիայի դիմաց» պայմանագրի երկարաձգման եւ ծավալների ավելացման վերաբերյալ փաստաթղթի ստորագրումը, ինչն իր հերթին կնպաստի երկու երկրների համագործակցության ընդլայնմանը: Անդրադարձ է կատարվել նաեւ փոխվարչապետի համանախագահությամբ գործող Հայ-իրանական միջկառավարական հանձնաժողովի գործունեությանը եւ դրա շրջանակներում քննարկվող երկկողմ հետաքրքրություն ներկայացնող հարցերին:
