Հայաստանում դրենաժային համակարգերի օգտագործումը կդառնա վճարովի։ Ջրային օրենսգրքում կառավարության ներկայացրած փոփոխությունները նախատեսում են դրենաժային համակարգերի օգտագործման ծառայությունների վճարման պայմանագրերի կնքում՝ կառավարության սահմանած կարգով: Ընդունվելու դեպքում փոփոխություններն ուժի մեջ կմտնեն արդեն 2021 թվականի հունվարի 1-ից։ Ներկայացնելով փոփոխությունները՝ Հայաստանի ջրային կոմիտեի նախագահ Կարեն Սարգսյանը նշել է, որ հանրապետության դրենաժային ցանցերի մաքրման, վերանորոգման եւ պահպանման համար միջինը հատկացվում է 290 մլն դրամ։ Դա թույլ է տալիս ամեն տարի մաքրել դրենաժային ցանցը՝ 190 կմ երկարությամբ, տեղեկացրել է նա՝ հավելելով, որ իրականում անհրաժեշտ է մաքրել, վերանորոգել եւ պահել մոտ 330 կմ ցանց։ Այս խնդիրը լուծելու համար կառավարությունն առաջարկում է փոփոխություններ կատարել Ջրային օրենսգրքում, որով դրենաժային համակարգերի օգտագործումը կիրականացվի պայմանագրային հիմունքներով։
