Իշխանության տարբեր թեւերի համագործակցությունը չի կարող խոչընդոտ դառնալ պետության զարգացմանը։ Այս մասին այսօր՝ մարտի 2-ին, խորհրդարանում հայտարարեց Հայաստանի նախագահի թեկնածու Վահագն Խաչատուրյանը։ «Երբ վարչապետ Նիկոլ Փաշինյանը հայտարարեց իշխանության տարբեր թեւերի միջև ներդաշնակություն ապահովելու անհրաժեշտության մասին, սա քաղաքական շահարկումների առիթ դարձավ։ Բայց իրականում ներդաշնակություն է պետք»,- ասաց նա։ Խաչատուրյանն ընդգծեց, որ ներդաշնակությունն ամենևին չի ենթադրում պարտադիր համաձայնություն բոլոր հարցերի շուրջ՝ առանց որևէ քննարկման։ «Վստահ եմ, որ խորհրդարանում կառավարության ցանկացած օրենսդրական նախաձեռնություն անմիջապես չի ընդունվում, այն անցնում է քննարկումների, հնարավոր է վեճերի ընթացքով։ Համենայն դեպս կառավարությունում այդպիսի իրավիճակ է։ Եվ այս տեսանկյունից, այո, կարծում եմ, որ Հայաստանի նախագահը պետք է ներդաշնակ աշխատի իշխանության բոլոր թեւերի հետ... և ոչ միայն իշխանության։ Այստեղ նկատի ունեմ քաղաքական ուժերին, հասարակական կազմակերպություններին, Սփյուռքի կազմակերպություններին` լինեն դա կուսակցություններ, թե հասարակական կազմակերպություններ»,- նշեց Խաչատուրյանը։
