Հայաստանի ԱԳ նախարար Արա Այվազյանը համաձայն չէ այն գնահատականների հետ, թե Զինված ուժերի գլխավոր շտաբի բարձրագույն սպայակազմի՝ վարչապետ Նիկոլ Փաշինյանի հրաժարականը պահանջող հայտարարությունը ռազմական հեղաշջման փորձ է: «Իհարկե, Ադրբեջանի սանձազերծած ագրեսիայի հետևանքներն իրենց բացասական ազդեցությունն ունեցան Հայաստանում ներքին կայունության վրա, սակայն ես ամենևին համաձայն չեմ Հայաստանում տեղի ունեցածը որպես պետական հեղաշրջման փորձ որակելու հետ», - ասել է Արա Այվազյանը «Ալ Արաբիա» լրատվական գործակալությանը տված հարցազրույցում: Հարցին, եթե դա հեղաշրջման փորձ չէր, ապա ի՞նչ էր, Արա Այվազյան կրկին նշել է, որ զինվորականներն արել են քաղաքական հայտարարություն, որն ինքնին «ռազմական հեղաշրջման փորձ չէ»: «Դա Գլխավոր շտաբի որոշ անդամների քաղաքական դիրքավորումն էր։ Պարզապես արվել է քաղաքական հայտարարություն, որն ինքնին ռազմական հեղաշրջման փորձ չէ», - հայտարարել է նա ու այդ կերպ հակասել կատարվածի վերաբերյալ վարչապետ Նիկոլ Փաշինյանի դիրքորոշմանը: «Այս առնչությամբ նմանատիպ գնահատականներ եղան տարբեր երկրներ և միջազգային կազմակերպությունների կողմից: Հայաստանում ռազմական հեղաշրջման տարրեր չկան: Եվ Հայաստանը շարունակում է մնալ ժողովրդավարություն, իսկ ներկայիս իրավիճակը, ինչպես ասացի, կհարթվի մեր հասարակության ժողովրդավարական չափանիշներին համապատասխան», - նկատել է նա: Հայաստանում քաղաքական ճգնաժամը սկսվել է Լեռնային Ղարաբաղում ռազմական գործողությունների ավարտից հետո և անցել է փետրվարի 25-ի սրման փուլը, երբ գլխավոր շտաբի պետ Օնիկ Գասպարյանը և բանակի շուրջ 40 բարձրաստիճան սպաներ հայտարարել են վարչապետ Նիկոլ Փաշինյանի ու կառավարության հրաժարականի անհրաժեշտության մասին: Վարչապետ Փաշինյանն այդ հայտարարությունը որակեց է որպես «ռազմական հեղաշրջման փորձ», Օնիկ Գասպարյանին պաշտոնից ազատելու միջնորդություն ներկայացրեց նախագահ Արմեն Սարգսյանին և Հանրապետության հրապարակում հրավիրեց հանրահավաք: Քաղաքական իշխանություն և ռազմական էլիտա դիմակայության արդյունքում Օնիկ Գասպարյանն ազատվեց ԶՈւ Գլխավոր շտաբի պետի պաշտոնից: Նիկոլ Փաշինյանն արդեն միջնորդություն է ներկայացրել նախագահ Արմեն Սարգսյանին Զինված ուժերի գլխավոր շտաբի պետի պաշտոնում Արտակ Դավթյանին նշանակելու համար: