Թուրքիայի արտգործնախարար Մևլութ Չավուշօղլուն հոկտեմբերի 6-ին աշխատանքային այցով կժամանի Ադրբեջան, հայտնում է "Անադոլու" գործակալությունը: Թուրքիայի արտաքին քաղաքական գերատեսչությունից հայտնել են, որ երկու երկրների արտաքին քաղաքական կառույցների ղեկավարները կքննարկեն ԼՂ հակամարտության գոտում տիրող իրավիճակը։ Տեղի կունենա մտքերի փոխանակում տարածաշրջանային և միջազգային օրակարգի արդիական հարցերի շուրջ: Թուրք նախարարին կընդունի Ադրբեջանի նախագահ Իլհամ Ալիևը։ Հիշեցնենք, որ սեպտեմբերի 27-ին Ադրբեջանը սկսել է ինտենսիվ հրետակոծել Լեռնային Ղարաբաղի բնակավայրերը, այդ թվում՝ Ստեփանակերտը՝ հարձակման անցնելով շփման գծի ողջ երկայնքով։ Գործողությունները, որոնք Բաքվում անվանում են "հակահարձակման", ընթանում են ռազմաճակատի հյուսիսային, արեւելյան եւ հարավարեւելյան հատվածներում: Հայաստանում հայտարարվել է ռազմական դրություն եւ համընդհանուր մոբիլիզացիա։ Ադրբեջանը նաեւ հայտարարել է իր տարածքում ռազմական դրություն և մասնակի զորահավաք:
