Պատերազմից հետո, երբ Հայաստանում խորացավ քաղաքական ճգնաժամը, մեր ուժը հայտարարեց, որ արտահերթ ընտրություններ պետք է լինեն և ՀՀ քաղաքացիները որոշեն, թե ով պետք է ստանձնի իշխանությունը և հենց ժողովուրդը պետք է որոշի, թե արդյոք այս իշխանությունները պետք է շարունակեն ղեկավարել երկիրը: Այս մասին Արտաշատում, մարզային հերթական այցելության շրջանակում կուսակցության ակտիվի հետ հանդիպմանը հայտարարեց «Հանուն սոցիալական արդարության» կուսակցության նախագահ Արման Ղուկասյանը: «Հայաստանի ճակատագիրը պետք է որոշի յուրաքանչյուր քաղաքացի և ոչ թե էլիտար նեղ ինչ-որ խմբեր փակ դռների ետևում: Բայց իրավիճակը ՀՀ սահմաններին, տարածաշրջանում, առհասարակ Հայաստանի շուրջ բերեց մի իրավիճակի, երբ քաղաքական ուժերը մտան միմյանց դեմ պայքարի մեջ, քանի որ ընտրությունները դա պայքար են, մինչդեռ այս օրհասական պահին օրակարգային է կոնսոլիդացումն ու միասնականությունը: Իսկ ընտրապայքարը չի կարող ապահովել միասնականություն՝ տեսանելի է լինելու պառակտումը, որը գնալով խորանալու է, ինչից էլ օգտվելու է թշնամին»,- ասաց նա:Հետևապես, նշեց նա, նախ պետք է լուծվեին այն խնդիրները, որոնք ծառացած են ՀՀ առջև, որից հետո միայն երկիրը գնար ընտրությունների:«Մեր քաղաքական ուժը որոշում է կայացրել չմասնակցել արտահերթ ընտրություններին, բայց դա չի նշանակում, որ մենք դուրս ենք մնում քաղաքական գործընթացներից: Հակառակը՝ ՀԱՍԱԿ-ը տեսնում է իր դերը նրանում, որ մենք կարողանանք ապահովել անհրաժեշտ կոնսոլիդացումը և, ըստ այդմ, պատրաստվենք հետագա գործընթացներին»,- ասաց նա: Ամփոփելով խոսքը Ղուկասյանը նշեց, որ այսօր շատ կարևոր ժամանակահատված է մեր երկրի համար, քանի որ կա՛մ ճգնաժամը խորանալու է և մենք հայտնվելու ենք էլ ավելի անկանխատեսելի հետևանքների առջև, կա՛մ պետք է միասնական լինենք և կատարենք ճիշտ ընտրություն: Իսկ նրանում, որ ժողովուրդը խոհեմ է , բանախոսը չի կասկածում:Իր հերթին, կուսակցության փոխնախագահ Ծովինար Կոստանյանն ասաց, որ մասնակցությունն ընտրություններին ինքնանպատակ չէ. քաղաքական ուժը պետք է ավելի հեռուն նայի ու պայքարի գաղափարների, այլ ոչ թե խորհրդարանում հայտնվելու համար: Մինչդեռ այսօր տեսնում ենք, որ հունիսի 20-ի ընտրություններին մասնակցելու հայտ ներկայացրած 26 ուժերից շատերը ընդամենը մի քանի ամսվա կյանք ունեն ու նրանց միակ նպատակը մասնակցությունն է ընտրապայքարին: «Քաղաքական ուժը, որն իսկապես ցանկանում է ինչ-որ բան փոխել երկրում և երկրի զարգացման մասնիկ դառնալ, պետք է մոռանա «ակտիվանալ ընտրությունից ընտրություն սկզբունքը» և կենտրոնացած լինի միայն Երևանում: Քանի՞սն է այդ ուժերից մայրաքաղաքից դուրս եկել, փորձել ծանոթանալ մարզային բնակիչների խնդիրներին ու լուծում պահանջող հրատապ հարցերին»,- ասաց նա:Կոստանյանը նաև հիշեցրեց, որ կուսակցությունը, բացի սոցիալական արդարության կարևորումը, մշտապես բարձրաձայնում է ազգային արժեքների պահպանության հարցը, որն այսօր առավել քան արդիական է՝ հաշվի առնելով մեր վտանգներով լի տարածաշրջանում վերջին զարգացումները.«Որպեսզի մենք կարողանանք պահպանել մեր պետությունն ու անկախությունը, առաջին հերթին մենք ինքներս պետք է պահպանենք մեր դիմագիծն ու ազգային արժեքները: Այսօր հատկապես կարևոր է հասկանալ, որ դրսից միլիոնավոր դոլարներ են ուղղվում մեր արժեքների ոչնչացմանը և պայքարենք այդ երևույթի դեմ: Պայքարը ոչ միայն մեր սահմաններին է, այլև մեր պետության ներսում»,- հավելեց նա:«Հանուն սոցիալական արդարության» կուսակցությունից հավաստիացրեցին, որ շարունակելու են մարզային այցելությունները: