Նախիջևանում արտադրվող ապրանքները առանց որևէ խոչընդոտների կարտահանվեն համաշխարհային շուկաներ։ Այդ մասին հայտարարել է Ադրբեջանի նախագահ Իլհամ Ալիևը, փոխանցում է ԱՊԱ–ն։ «Մենք ձգտում ենք լուծել Նախիջևանի տրանսպորտային խնդիրները։ Սկսել է գործել Նախիջևան–Թեբրիզ–Մեշհեդ երկաթգիծը։ Իրանի ու ՌԴ–ի հետ Ադրբեջանն իրականացնում է Հյուսիս–Հարավ տրանսպորտային միջանցքը։ Նախիջևանն երկաթգծի միջոցով Իրանի տարածքով կկապնվի Ադրբեջանի հետ»,–նշել է նա։ Ադրբեջանական Trend լրատվական գործակալության փոխանցմամբ՝ 2016 թվականի դեկտեմբերի 29-ից գործարկվում է Նախիջևան-Մեշհեդ-Նախիջևան ճեպընթաց գնացքների երթերը։ Այս մասին այսօր հայտարարել է «Ադրբեջանական երկաթուղիներ» ընկերությունը։ Գնացքների երթերը նախատեսված են շաբաթական երկու անգամ՝ հինգշաբթի ու կիրակի։ Տոմսերի վաճառքը սկսվել է դեկտեմբերի 24-ից՝ Նախիջևան ու Ջուլֆա կայարաններում։ Նախիջևան-Մեշհեդ-Նախիջևան երթուղով շարժվող ճեպընթաց գնացքները կանգառներ են ունենալու իրանական Ջուլֆայում, Թավրիզում ու Թեհրանում։ Նախիջևանից Մեշհեդ և հակառակ ուղղությամբ գնացքների տոմսն արժենալու է 40 շվեյցարական ֆրանկ՝ յուրաքանչյուր ուղղությամբ։