Կապանի քաղաքապետ Գևորգ Փարսյանը հայտնել է, որ Դավիթ Բեկ-Շուռնուխ ճանապարհահատվածում, որը Կապան-Երևան ճանապարհի մի մասն է, ադրբեջանցի զինվորականները քարեր են նետել հայկական մեքենայի ուղղությամբ։ Կապանի քաղաքապետը ԶԼՄ-ներին ասել է, որ միջադեպի հետ կապված արդեն տեղեկացրել է ռուս խաղաղապահներին։ «Միջադեպի հետ կապված տուժողներ չկան։ Միջադեպն ավելի կոնկրետ տեղի է ունեցել Դավիթ Բեկ-Շուռնուխ ճանապարհահատվածում։ Ռուս խաղաղապահներն արդեն տեղյակ են՝ ինչ է տեղի ունեցել, իսկ Սյունիքի մարզպետարանի հետ կապված՝ ոչինչ չեմ կարող ասել»,- նշեց Գևորգ Փարսյանը՝ հավելելով, որ այս ճանապարհահատվածում նման միջադեպ առաջին անգամ է։ Հատկանշական է, որ մարտի 29-ին Գորիսի ճանապարհահատվածում ադրբեջանցի զինվորականները քարեր էին նետել հայ զինվորների դիերը տեղափոխող մեքենայի ուղղությամբ։ Դրա հետևանքով մեքենան վնասվել էր։
