ՀՀ ԱԺ նախագահի տեղակալ Ռուբեն Ռուբինյանը հուլիսի 9-ին ընդունել է Նիդերլանդների Թագավորության խորհրդարանի Ներկայացուցիչների պալատի արտաքին հարաբերությունների մշտական հանձնաժողովի պատվիրակությանը: Հանդիպմանը մասնակցել են Հայաստանում Նիդերլանդների Թագավորության դեսպանության գործերի ժամանակավոր հավատարմատար Յապ Ֆրեդերիքսը եւ Նիդերլանդներում Հայաստանի արտակարգ եւ լիազոր դեսպան Վիկտոր Բիյագովը: Ողջունելով պատվիրակությանը խորհրդարանում` Ռուբեն Ռուբինյանը բարձր է գնահատել երկու երկրների միջեւ առկա հարաբերությունները: Նա ընդգծել է միջխորհրդարանական դիվանագիտության դերը երկկողմ հարաբերությունների զարգացման գործում` նշելով, որ Հայաստանի համար կարեւոր է ԵՄ գործընկերությունը: Պատվիրակության անդամ Դերկ Բոսվյակը շնորհակալություն է հայտնել ջերմ ընդունելության համար` ընդգծելով, որ Հայաստանը շատ կարեւոր երկիր է Նիդերլանդների համար: ԱԺ նախագահի տեղակալը պատվիրակությանը ներկայացրել է Հարավային Կովկասում կայուն խաղաղության հասնելու Հայաստանի տեսլականը: Ռուբեն Ռուբինյանը պատասխանել է պատվիրակության անդամների հարցերին` անդրադառնալով Հայաստան-Ադրբեջան, Հայաստան-Թուրքիա հարաբերություններին, Հայաստանում ժողովրդավարական բարեփոխումների առաջընթացին, առկա մարտահրավերներին:
