Այս տարվա ընթացքում Հայաստանի կառավարությունը լրացուցիչ 20 միլիարդ դրամ կհատկացնի Արցախի բնակարանաշինական ծրագրերի համար՝ հաշվի առնելով Արցախում առկա բնակարանային հրատապ կարիքները․ այս մասին Ֆեյսբուքում գրել է Արցախի պետական նախարար Արտակ Բեգլարյանը։ Ապրիլի 29-ին Երևանում անցկացվեց Հայաստանի ու Արցախի կառավարությունների անդամների հանդիպումը։ «Իհարկե, նաև մտքեր են փոխանակվել Արցախի անվտանգության, կարգավիճակի ու հակամարտության կարգավորման գործընթացի վերաբերյալ: Հիմնական օրակարգային երկու հարցերը Արցախի սոցիալ-տնտեսական վիճակը և ադրբեջանա-ղարաբաղյան հակամարտության կարգավորման գործընթացն էին»,- գրել է Բեգլարյանը։ Ապրիլի 29-ի հանդիպմանը Փաշինյանն ասել է, որ Լեռնային Ղարաբաղի հիմնախնդրի կարգավորման թիվ մեկ շահառուն Արցախն է և Արցախի ժողովուրդը․ «Այնպիսի բովանդակություն, որ բանակցվի և իրագործվի ծածուկ, դա ուղղակի անտրամաբանական է։ Նման բան երևակայելն ուղղակի անհնար է»,- նշել է նա։ Նիկոլ Փաշինյանը նաև կարևորել է, որ Արցախի իշխանությունները նույնպես որդեգրում են խաղաղության օրակարգը: Արցախի Հանրապետության նախագահ Արայիկ Հարությունյանն ասել է, որ այսօր Արցախում քաղաքական առումով ձևավորված է ընդհանուր մթնոլորտ, և արցախահայությունը նախ, առաջինը՝ իհարկե, ողջունում է ու ընդունում է խաղաղության օրակարգը, քանի որ արցախցիներից ավելի շատ խաղաղության գին իմացող երևի թե չկա:
