Փաշինյանն ու Էստոնիայի խորհրդարանի նախագահը քննարկել են ՀՀ-ԵՄ կապերի խորացումը

Ապրիլի 28-ին, պաշտոնական այցի շրջանակում, ՀՀ վարչապետ Նիկոլ Փաշինյանը հանդիպել է Էստոնիայի խորհրդարանի՝ Ռիիգիկոգուի նախագահ Լաուրի Հուսարի հետ։

Կառավարության մամուլի ծառայության տեղեկացմամբ՝ հանդիպման մեկնարկին վարչապետը գրառում է կատարել Պատվավոր հյուրերի գրքում, որից հետո զրույցը շարունակվել է աշխատանքային ճաշի ընթացքում։

Լաուրի Հուսարը կարևորել է ՀՀ վարչապետի այցը՝ վստահություն հայտնելով, որ հայ-էստոնական երկկողմ համագործակցությունը կշարունակի ընդլայնվել և ամրապնդվել։ Կողմերը ընդգծել են միջխորհրդարանական կապերի զարգացման անհրաժեշտությունը, այդ թվում՝ միջազգային հարթակներում։

Հանդիպմանը քննարկվել է Հայաստան-Եվրոպական միություն հարաբերությունների հետագա խորացման հարցը։ Փաշինյանը և Հուսարը մտքեր են փոխանակել նաև տարածաշրջանային զարգացումների, մասնավորապես՝ Հայաստանի և Ադրբեջանի միջև խաղաղության գործընթացի շուրջ։