Հայ ռազմագերիների վերադարձի հարցը նաև ՌԴ ղեկավարության առաջնահերթություններից է. դեսպան

Հայ ռազմագերիների և պահվող անձանց վերադարձի հարցն առաջնահերթություններից է, այդ թվում Ռուսաստանի ղեկավարության և մեր խաղաղապահ անձնակազմի աշխատանքի առումով: Այս մասին մարտի 26-ին լրագրողների հետ զրույցում ասաց ՀՀ-ում ՌԴ դեսպան Սերգեյ Կոպիրկինը։

Նա նշեց, որ դա հեշտ լուծվող հարց չէ, բայց աշխատանքները տարվում են և անգամ որոշակի հաջողություններ են գրանցվում: Անդրադառնալով ապրիլի 2-ին ՌԴ, ՀՀ և Ադրբեջանի արտգործնախարարների սպասվելիք հանդիպմանը և հարցին, թե հնարավոր է գերիների վերադարձի հարցում ինչ-որ տեղաշարժ լինի, դեսպանը համոզմունք հայտնեց, որ հետագայում ևս կարվի ամեն բան, որպեսզի այս հարցը լուծվի ու լուծվի հնարավորինս շուտ։

«Տրամաբանական մոտեցում է «բոլորը բոլորի դիմաց փոխանակումը»։ Արվում է ամեն հնարավորը, և կարծում եմ՝ այո, հանդիպումների ընթացքում այս թեման ևս կքննարկվի», - շեշտեց ՌԴ դեսպանը:

Սերգեյ Կոպիրկինն անդրադարձավ նաև հայ-ռուսական համագործակցության պաշտպանության բնագավառում՝ նշելով, որ երկու երկրների ռազմական գերատեսչությունների միջև համագործակցությունը շատ սերտ ու ինտենսիվ է ու լիովին արտացոլում է այն ռազմավարական, դաշնակցային բնույթը, որը կապում է Հայաստանին ու Ռուսաստանին.

«Այս համագործակցությունը բխում է անվտանգության ոլորտում այն իրողություններից ու կարիքներից, որոնք այսօր կան», -  հավելեց դեսպան Կոպիրկինը: