Հայաստանի կառավարությունը հաստատել է ֆինանսական նոր խթաններ պայմանագրային զինծառայողների համար։ «Պաշտպան հայրենյաց» ծրագիրն այսուհետ խոշոր միանվագ պատվովճարներ կտրամադրի ծառայության ժամկետի երկարաձգման դեպքում, ինչպես նաև կդյուրացնի պարտադիրից պայմանագրային ծառայության անցնելու պայմանները: Պաշտպանության փոխնախարար Արման Սարգսյանը գործադիրի նիստում ներկայացրել է որոշման նախագիծը, որի համաձայն՝ նշված ծրագրով ծառայող և առաջին պայմանագրի ժամկետն ավարտած անձինք նոր փաստաթուղթ կնքելիս լրացուցիչ ֆինանսական խրախուսում կստանան։ Պատվովճարի չափը կախված է լինելու նոր պայմանագրի տևողությունից։ Երկու տարով ծառայությունը երկարաձգելու պարագայում նախատեսվում է վճարել 1,5 միլիոն դրամ, իսկ հինգ տարով կնքելու դեպքում՝ 5 միլիոն դրամ։ Բացի այդ, փոփոխություններ են կատարվել նաև ծրագրին միանալու ժամկետներում։ Այսուհետ պարտադիր ժամկետային զինծառայողները կարող են պայմանագրային հիմունքների անցնելու դիմում ներկայացնել ծառայության չորրորդ ամիսը լրանալուն պես՝ նախկինում գործող վեց ամսվա փոխարեն: Ներկայիս կարգավորումներով «Պաշտպան հայրենյաց» ծրագրի մասնակիցները հինգ տարի ժամկետով առաջին պայմանագրի ավարտից և զորացրվելուց հետո ստանում են 5 միլիոն դրամ պատվովճար։ Կառավարության նոր որոշումը նպատակ ունի լրացուցիչ շարժառիթներ ստեղծել նրանց համար, ովքեր կորոշեն շարունակել իրենց զինվորական ուղին և Պաշտպանության նախարարության հետ կնքել նոր պայմանագիր:
