ՀՀ կառավարությունը փոփոխություններ է կատարել արցախցիների բնակապահովման պետական ծրագրում՝ ավելացնելով բնակավայրերի ցանկը, երկարաձգելով դիմումների վերջնաժամկետը մինչև 2027 թվականը և ավելացնելով աջակցությունը տնօրինելու հնարավորությունները։ Հուլիսի 3-ի կառավարության նիստում Աշխատանքի և սոցիալական հարցերի նախարար Նարեկ Մկրտչյանը ներկայացրեց արցախցիների բնակարանային ապահովման ծրագրում կատարված փոփոխությունները։ Ըստ նոր որոշման՝ բնակարան ձեռք բերելու համար պետական աջակցությամբ հնարավոր կլինի ընտրել ավելի լայն թվով բնակավայրեր․ նախորդ 452 բնակավայրի փոխարեն այժմ ցուցակը կներառի 611 բնակավայր՝ տեղակայված տարբեր համայնքներում։ Նախարարը հայտնեց, որ պետական աջակցությունը պահպանվում է՝ յուրաքանչյուր ընտանիքի անդամի համար 4 միլիոն դրամի սահմանաչափով։ Միաժամանակ, մեկնարկել են ծրագրի երրորդ և չորրորդ փուլերը, որոնք կներառեն բռնագաղթածների բոլոր թիրախային խմբերը։ Մեկ այլ կարևոր փոփոխություն է նաև ծրագրի դիմումների վերջնաժամկետի երկարաձգումը՝ մինչև 2027 թվականի դեկտեմբերի 31-ը (նախկինում՝ մինչև 2025 թվականի ավարտը)։ Սա հնարավորություն է տալիս առավել լայն շրջանակի շահառուների օգտվել ծրագրից։ Բացի այդ, եթե ընտանիքը բնակարան է ձեռք բերում՝ աջակցության գումարից ավելի ցածր գնով, ապա մնացած գումարը կարող է օգտագործել երեք տարբեր նպատակով՝ բնակարանի վերանորոգման, գյուղատնտեսական նշանակության հողամասի ձեռքբերման կամ կահույքի և կենցաղային տեխնիկայի գնման համար։ Նախարար Մկրտչյանը նաև տեղեկացրեց, որ ծրագրի շրջանակում առաջարկվում է ստեղծել միջգերատեսչական հանձնաժողով, որը կուսումնասիրի այն դեպքերը, երբ դիմողները չկարողացել են ստանալ աջակցություն, չնայած ծրագրին դիմելուն։ Հուլիսի 1-ի դրությամբ բնակարանային աջակցության հավաստագիր ստացել է ավելի քան 1600 ընտանիք, որոնցից շուրջ 390-ը արդեն իրականացրել են այդ հնարավորությունը՝ դարձնելով ծրագիրը գործնական արդյունք ունեցող գործիք բռնագաղթած ընտանիքների համար։