Հանրապետության նախագահ Վահագն Խաչատուրյանին իր հավատարմագրերն է հանձնել Հայաստանում Ավստրիայի արտակարգ և լիազոր դեսպան Ռոբերտ Գերշները (նստավայրը՝ Թբիլիսի): Նախագահը շնորհավորել է դեսպանին նշանակման կապակցությամբ և հաջողություններ մաղթել: «Վստահ եմ, որ Ձեր գործունեությունը կնպաստի և ավելի բարձր մակարդակի կհասցնի մեր համագործակցությունը: Հայաստանը բարձր է գնահատում և կարևորում է Ավստրիայի հետ համագործակցությունը: Վերջին ժամանակաշրջանում դրանք ավելի ինտենսիվ են դարձել: Ցանկանում եմ նաև շնորհակալություն հայտնել Ավստրիային, Ավստրիայի իշխանություններին այն աջակցության համար, որ ցուցաբերել է Հայաստանին»,- ասել է նախագահը: Նորանշանակ դեսպանը շնորհակալություն է հայտնել ընդունելության և ջերմ խոսքերի համար: «Ուրախ եմ, որ կարող ենք արձանագրել, որ մեր երկու երկրների միջև հարաբերություններն ի սկզբանե, 1992 թվականից ի վեր, բարեկամական են եղել, և, ինչպես ճշմարտացիորեն նշեցիք, վերջին տարիներին լրացուցիչ դրական դինամիկա և զարգացում են գրանցվել դրանցում»,- ասել է դեսպանը: Հանդիպման ընթացքում կարևորվել են երկու երկրների միջև առկա սերտ համագործակցությունը՝ ինչպես երկկողմ, այնպես էլ Եվրամիության ձևաչափերով: Առանձնահատուկ կերպով շեշտվել են Հայաստանում Ավստրիական զարգացման գործակալության գնահատելի գործունեության կարևոր դերակատարությունն ու նշանակությունը: Անդրադարձ է կատարվել քաղաքական, տնտեսական, կրթամշակութային փոխգործակցության հետագա ընդլայնման հնարավորություններին: Կողմերը դրական են գնահատել երկրների միջև տարբեր մակարդակներում արդյունավետ շփումներն ու փոխայցելությունները, որոնք նոր խթան են հանդիսանում տարբեր ոլորտներում արդյունավետ գործակցության ամրապնդման համար:
