Կառավարության ներկայացրած արտահերթ նիստի օրակարգը չի արտացոլում այն իրավիճակը, որում գտնվում է երկիրն ու ժողովուրդը։ Այս մասին այսօր՝ նոյեմբերի 3-ին, հայտարարել է «Բարգավաճ Հայաստան» խմբակցության քարտուղար Արման Աբովյանը։ Աբովյանը նշել է, որ արդեն երկրորդ օրն է, ինչ Բաքվում դատվում են հայ ռազմագերիները: «Փաստորեն, Ադրբեջանը փորձում է լեգիտիմացնել և ապահովել հայ գերիներին չվերադարձնելու իրավական հիմնավորումը», - հայտարարեց պատգամավորը: Նա ընդգծել է, որ հայկական կողմը պարտադիր պետք է արձագանքի կատարվածին, հակառակ դեպքում դա կնշանակի համաձայնություն։ «Սա շատ կարեւոր խնդիր է։ Մենք չպետք է մոռանանք, որ մեր գերիները դեռ այնտեղ են։ Ադրբեջանական կողմի գործողությունները պետք է արժանանան պատշաճ գնահատականների ինչպես Ազգային ժողովի, այնպես էլ իշխանության և ընդդիմության կողմից», - հայտարարել է Աբովյանը։ Պատգամավորն անդրադարձավ նաև Աբովյան դիահերձարանում զոհված զինծառայողների մարմինների ոչ պատշաճ պահպանման իրավիճակին: Նրա խոսքով՝ այս պահին կարևոր է հասկանալ, թե որոնք են եղել ստեղծված իրավիճակի պատճառները, և հնարավոր է, որ զոհված զինծառայողների մարմինները պահվում են նաև այլ բուժհաստատությունների դիահերձարաններում:
