Քաղաքապետարանում հանդիպել ենք Եվրոպական հանձնաժողովի Արևելյան հարևանության գծով տնօրեն Լոուրենս Մերեդիթի գլխավորած ԵՄ պատվիրակության հետ։ ԵՄ կառույցների աջակցությամբ Երևանը համագործակցության տարբեր ծրագրեր է իրականացնում, որոնք վերաբերում են քաղաքային տնտեսության մի շարք ոլորտներին։ Այս մասին Facebook-ի իր էջում գրել է Երևանի քաղաքապետ Հայկ Մարությանը:"Հայտնի է, որ ԵՄ տնտեսական և ներդրումային պլանի ներքո Հայաստանին տրամադրվելիք 2.6 մլրդ եվրո աջակցության փաթեթից որոշակի մաս ուղղվելու է Երևանին։ Այս առումով առանձնացրել ենք մի քանի ուղղություն:Մասնավորապես, առաջակում ենք գործակցությունն ընդլայնել հասարակական տրանսպորտի բարեփոխումների իրականացման, Երևանի էներգաարդյունավետության բարձրացման, կոշտ կենցաղային աղբի կառավարման, Երևան «Խելացի քաղաք» հայեցակարգի, ինչպես նաև Մետրոպոլիտենի արդիականացման ծրագրերի ուղղությամբ: Սրանք ծրագրեր են, որոնք առնչվում են յուրաքանչյուր երևանցու և մեծ դերակատարում կարող են ունենալ բնակիչների կյանքի որակի բարձրացման վրա: Այս նախագծերի կյանքի կոչման արդյունքում մեր համագործակցության և Եվրոպական կառույցների աջակցության արդյունավետությունը կզգա յուրաքանչյու քաղաքացի: Եվրոպացի գործընկերների հետ պայմանավորվեցինք համագործակցության նոր ծրագրերը հնարավորինս շուտ տեղափոխել գործնական փուլ",- գրել է քաղաքապետը:
