Գտնվելու վայրն անհայտ զինծառայողների ծնողներն ապրիլի 25-ին ՀՀ մարդու իրավունքների պաշտպան Անահիտ Մանասյանին են ներկայացրել իրենց հուզող հարցերը: Ինչպես տեղեկանում ենք ՄԻՊ-ի գրասենյակից, հանդիպման ընթացքում ծնողները բարձրացրել են իրենց զավակների ճակատագրերի վերաբերյալ տեղեկություններ ստանալու, դատագենետիկական փորձաքննությունների արդյունքների և քրեական վարույթների հետ կապված մի շարք հարցեր: Մարդու իրավունքների պաշտպանը ևս մեկ անգամ նշել է, որ ծնողների բարձրացրած հարցերն իր ամենօրյա հատուկ ուշադրության ներքո են: Պաշտպանի իրավասության սահմաններում ներպետական և միջազգային կառույցների ու դերակատարների հետ առաջնահերթ քննարկվում են զինծառայողների ճակատագրերի վերաբերյալ հարցերը: 44-օրյա պատերազմի մասնակից զինծառայողների ընտանիքների հետ հանդիպումները կրելու են շարունակական բնույթ:
