ԱԱԾ-ն անհրաժեշտ է կապիտուլյանտների շարժառիթները պարզելու գործում. Քոչարյանի գրասենյակ

ՀՀ երկրորդ նախագահի գրասենյակն արձագանքել է նոյեմբերի 9-ի գիշերը Կառավարության շենքի դիմաց բողոքի գործողությունների մասնակիցների վերաբերյալ ԱԱԾ-ի հայտարարությանը:

«Ինչպես հայտնի է, այսօր ՀՀ ԱԱԾ-ն, բառացիորեն արտատպելով Փաշինյանի խոսնակի հին տեքստերից մեկը, մի հաղորդագրություն է տարածել, ուր ազդարարել է Կառավարության շենքի դիմաց բողոքի գործողությունների մասնակիցների մեջ նախագահ Քոչարյանի կողմնակիցներին հերոսաբար հայտնաբերելու մասին։

Հարկ ենք համարում նշել, որ նման հայտնագործություն անելու համար պետք չէ ԱԱԾ լինել։ Հանրահայտ փաստ է, որ Նախագահ Քոչարյանը հազարավոր կողմնակիցներ ունի, որոնք հայրենասեր, քաղաքականապես ակտիվ մարդիկ են և մշտապես մասնակցում են բողոքի տարբեր գործողությունների և հանրահավաքների։ ԱԱԾ ֆունկցիաները և կարողություններն անհրաժեշտ են մեկ այլ՝ դավաճան-կապիտուլյանտների շարժառիթները պարզելու գործում։

Մի՛ հապաղեք։

ՀՀ երկրորդ Նախագահի գրասենյակ», - ասված է հայտարարության մեջ: