Խոշոր հարկատուների բյուջե վճարած գումարները նվազել են 15.3%-ով

Հայաստանի խոշոր հարկ վճարողները այս տարվա հունվար-հունիս ամիսներին 15.3%-ով ավելի քիչ հարկեր են վճարել՝ նախորդ տարվա նույն ժամանակահատվածի համեմատ:

Եթե նախորդ տարվա նույն ժամանակահատվածում հազար ամենախոշոր հարկատուները վճարել են ընդհանուր առմամբ 801.6 միլիոն դոլար հարկ, ապա այս տարի այդ ցուցանիշը կազմել է 678.7 միլիոն դոլար, փոխանցում է Ազատությունը:

Այդ ցուցանիշները տարօրինակ են կառավարության անդամների անընդհատ հնչող տնտեսական աճի մասին հայտարարությունների ֆոնին: Չնայած եթե սկզբում տնտեսական բլոկի նախարարները 2015թ.-ին խոստացել են 4%-ոց տնտեսական աճ, ապա այսօր խոսվում է միայն 1%-ոց աճի մասին:

Չնայած մի շարք կարևոր ցուցանիշների անկմանը, այդ թվում հարկահավաքման, վարչապետ Հովիկ Աբրահամյանը շարունակում է դատարկ խոսակցություններ համարել այս տարի տնտեսական անկման մասին իրատեսական կանխատեսումները: