Գիշերն առաջնագծում հանգիստ է եղել. Հասրաթյան

Գիշերը սահմանին հանգիստ է եղել: Այս մասին VERELQ-ի հետ զրույցում ասաց Արցախի ՊԲ մամուլի քարտուղար Սենոր Հասրաթյանը՝ նշելով, որ լուրջ միջադեպեր շփման գծում չեն արձանագրվել:

«Իրավիճակը համեմատաբար հանգիստ է եղել: Պաշտպանության բանակը վերահսկում է ամբողջ առաջնագիծը»,- վստահեցրեց նա:

Ինչպես ավելի վաղ տեղեկացրել էինք, հուլիսի 4-ին արցախա-ադրբեջանական հակամարտ զորքերի շփման գծի տարբեր հատվածներում հակառակորդը շարունակել է խախտել հրադադարի պահպանման ռեժիմը:

Ինչպես հայտնում է Արցախի ՊԲ մամուլի ծառայությունը, մասնավորապես, ժամը 11:30-11:35 սահմաններում արևելյան ուղղությամբ ադրբեջանական կողմը կիրառել է 82 միլիմետրանոց ականանետ (4 արկ), նույն հատվածում ժամը 12:45-12:55-ի սահմաններում՝ հաստոցավոր հակատանկային նռնականետ (3 արկ), հարավային ուղղությամբ՝ ժամը 13:35-ին 60 միլիմետրանոց ականանետ (3 արկ), 19:10-ին՝ 60 միլիմետրանոց ականանետ (2 արկ), իսկ 20:20-20:30-ի սահմաններում Ալխանլու գյուղում տեղակայված ռազմակայանից ադրբեջանական զինուժը ՏՌ-107 տիպի համազարկային հրթիռային կայանքներից (5 արկ) կրակ է բացել հարավային ուղղությամբ գործող զորամասերից մեկի հրամանատարական կետի ուղղությամբ՝ 20:48-ին կիրառելով նաև 82 միլիմետրանոց ականանետ (3 արկ):