Արա Բաբլոյանը՝ ԱԺ նախագահ. ՀՀԿ-ն հրապարակեց անունները

ԱԺ նախագահի պաշտոնում ՀՀԿ-ն տեսնում է Արա Բաբլոյանին, քանի որ Բաբլոյանն ունի երկարամյա փորձ և՛ գործադիրում, և՛ օրենսդիրում: Այս մասին ՀՀԿ ԳՄ նիստից հետո հայտարարեց ՀՀԿ խոսնակ Էդուարդ Շարմազանովը:

Վերջինս, ի դեպ, կշարունակի պաշտոնավարել ԱԺ փոխնախագահի պաշտոնում, իսկ երկրորդ փոխնախագահը ՀՀԿ-ից կլինի Արփինե Հովհաննիսյանը:

Հանրապետական կուսակցության խմբակցությունը կշարունակի ղեկավարել Վահրամ Բաղդասարյանը: Ինչ վերաբերում է մշտական հանձնաժողովներին, ապա ԱԺ աշխատակազմի նախկին ղեկավար Հրայր Թովմասյանը կզբաղեցնի ԱԺ պետաիրավական հարցերի մշտական հանձնաժողովի նախագահի պաշտոնը, ՀՀԿ փոխնախագահ Արմեն Աշոտյանը՝ ԱԺ արտաքին հարաբերությունների մշտական հանձնաժողովը, Խոսրով Հարությունյանը՝ ԱԺ տնտեսական հարցերի մշտական հանձնաժողովը: Ներքին գործեր և անվտանգության հարցերի հանձնաժողովի նախագահի պաշտոնում կշարունակի մնալ Կորյուն Նահապետյանը, իսկ միացված Առողջապահության և սոցիալական հարցերի հանձնաժողովի նախագահի պաշտոնում ՀՀԿ-ն կառաջարկի Հակոբ Հակոբյանին:

Նշենք, որ վաղը տեղի կունենա նորընտիր Ազգային Ժողովի անդրանիկ նիստը և վաղը կառավարությունը հրաժարական կտա: