Նախագահի թեկնածու, «Առաջ» շարժման հիմնադիր Էմանուել Մաքրոնը Ֆրանսիայի նախագահական ընտրությունների երկրորդ փուլում առաջ է անցել իր գլխավոր մրցակից «Ազգային ճակատ» կուսակցության առաջնորդ Մարին Լե Պենից:
Այս մասին վկայում են ՆԳ նախարարության տվյալները, որը պատասխանատու է քվեարկության կազմակերպման եւ արդյունքների ամփոփման համար: Ինչպես հայտնում եմ միջազգային լրատվամիջոցները, ըստ 4,1 մլն ձայների հաշվարկի արդյունքների՝ Մաքրոնը ստացել է 60,19 տոկոս, Լե Պենը՝ 39,81 տոկոս:
Միեւնույն ժամանակ հայտնի են արդեն նաեւ Ֆրանսիայում անցկացված exit-poll-երի արդյունքները, որոնք եւս հաստատում են քվեաթերթիկների հաշվարկի նախնական պատկերը: Ըստ այդ exit-poll-ի արդյունքների, «Առաջ» շարժման հիմնադիր Էմանուել Մաքրոնը ստանում է քվեների շուրջ 66 տոկոսը եւ ընտրվում Ֆրանսիայի նախագահի պաշտոնում: Այս մասին հայտնում է BFMTV-ը:
Նրա գլխավոր մրցակից «Ազգային ճակատ» կուսակցության առաջնորդ Մարին Լե Պենն արդեն ընդունել է իր պարտությունը եւ հայտարարել է խորհրդարանական ընտրությունների ընտրարշավի սկզբի մասին:
Մաքրոնին շնորահավորել է նաեւ Ֆրանսիայի գործող նախագահ Ֆրանսուա Օլանդը: Նրա խոսքով, ընտրությունների արդյունքները ցույց են տալիս, որ ֆրանսիացիների մեծ մասը ցանկացավ միավորվել «հանրապետության արժեքների» շուրջ:
Մարին Լե Պենն իր հայտարարության մեջ նշել է, որ ֆրանսիացիները ընտրել են նոր նախագահ եւ նախապատվություն տվել մշտականությանը: «Ես նրան հաջողություն եմ մաղթում մեծ փորձությունների ճանապարհին», - ասել է նա՝ հավելելով, որ իր ղեկավարած կուսակցությունը պետք է իրականացնի «խորքային փոփոխություններ ֆրանսիացիների սպասելիքներին համապատասխանելու համար»:
Նա նշել է, որ իր շարժման փոխակերպումը կհանգեցնի նոր քաղաքական ուժի ձեւավորմանը, հայտնում է Reuters-ը:
Հիշեցնենք, որ շնորհավորական ուղերձ է հղել Ֆրանսիայի նորընտիր նախագահ Էմանուել Մաքրոնին նաեւ Հայաստանի նախագահ Սերժ Սարգսյանը: