Մայր Աթոռը կոչ է անում վերականգնել «զավթված բոլոր եկեղեցիների» օրինական կարգավիճակը

Հայաստանյայց Առաքելական Սուրբ Եկեղեցին խիստ մտահոգություն է հայտնում Հովհաննավանքում ստեղծված իրավիճակի կապակցությամբ՝ մեղադրելով իշխանություններին կարգալույծ հոգևորականին հովանավորելու և պատմական սրբավայրը խնջույքների վայրի վերածելուն աչքաթող անելու մեջ:

Ըստ Մայր Աթոռի տեղեկատվական համակարգի տարածած հաղորդագրության՝ վերջին շրջանում վանքապատկան տարածքում անցկացվում են սրբավայրին անհարիր միջոցառումներ, որոնք խաթարում են վանքի հոգևոր մթնոլորտը և լուրջ անհանգստություն պատճառում շրջակայքի բնակիչներին:

Այս հայտարարությանը նախորդել էին հայկական լրատվամիջոցների, մասնավորապես՝ «Իշխանություն» կայքի հրապարակումները: Հղում անելով Օհանավանի բնակիչների ահազանգերին և տրամադրված տեսանյութերին՝ աղբյուրը հայտնել էր, որ Մայր Աթոռի կողմից կարգալույծ հռչակված Ստեփան Ասատրյանը Հովհաննավանքի տարածքը վերածել է յուրօրինակ «բիզնես կենտրոնի»: Ըստ բնակիչների՝ վանքի տարածքում տեղադրվում են վրաններ, կազմակերպվում են կերուխումներ, իսկ հոգևոր լռության փոխարեն հնչում է անընդունելի, այդ թվում՝ ռուսական քրեական ենթամշակույթին բնորոշ երաժշտություն:

Էջմիածինն այս ամենը որակում է որպես օրենքի և Եկեղեցու իրավունքների կոպտագույն խախտում: «Այս իրավիճակն անմիջական հետևանքն է կարգալույծ հռչակված Ստեփան Ասատրյանի նկատմամբ իշխանությունների բացահայտ հովանավորության և թողտվության»,- ընդգծվում է պաշտոնական հաղորդագրության մեջ: Մայր Աթոռը շեշտում է, որ Հովհաննավանքի բռնազավթումն ու ինքնիրավչությունը ոչ միայն վիրավորում են հավատացյալների բարեպաշտական զգացումները, այլև մոլորության մեջ են գցում այցելուներին՝ այնտեղ իրականացվող անվավեր ծեսերի միջոցով:

Արձանագրելով երևույթի անթույլատրելիությունը՝ Մայր Աթոռ Սուրբ Էջմիածինը կոչ է անում պետական մարմիններին վերջ դնել եկեղեցական կյանքին ուղղված պառակտիչ միջամտություններին և հրատապ կերպով վերականգնել զավթված բոլոր եկեղեցիների օրինական կարգավիճակը: