Իրանի նախագահը Երևանում է՝ բարձրաստիճան քաղաքական-տնտեսական պատվիրակությամբ

Իրանի նախագահ Մասուդ Փեզեշքիանը բարձրաստիճան քաղաքական և տնտեսական պատվիրակության գլխավորությամբ երկօրյա պաշտոնական այցով ժամանել է Հայաստան։

Նրան «Զվարթնոց» օդանավակայանում դիմավորել է ՀՀ փոխվարչապետ Մհեր Գրիգորյանը։ Նախատեսվում է, որ Հայաստանից հետո նախագահը կմեկնի Բելառուս։

Թեհրանի պաշտոնական տեղեկատվության համաձայն՝ այցի նպատակն է խորացնել համագործակցությունը հարևան երկրների հետ և արագացնել արդեն իսկ ստորագրված հայ-իրանական պայմանավորվածությունների գործնական իրականացումը։

Համագործակցության ոլորտները ներառում են էներգետիկան, տրանսպորտը, առևտուրը, ներդրումները, առողջապահությունը, շրջակա միջավայրը, գիտությունը, մշակույթը և զբոսաշրջությունը։

Մեկնելուց առաջ Փեզեշքիանը Հայաստանը բնորոշել է որպես «բարիդրացիական և բարեկամ» երկիր, որի հետ Իրանն ունի ռազմավարական հարաբերություններ։ Նա ընդգծել է, որ այցը «ավելի շատ ուղղված է քայլերի և համաձայնագրերի արագ և արդյունավետ առաջմղմանը»։

Բացի այդ, Հայաստան այցից առաջ Իրանի նախագահը հանդիպում է անցկացրել Երևանի և Բաքվի միջև տրանսպորտային միջանցքի վերաբերյալ համաձայնագրի վերաբերյալ՝ շեշտը դնելով Իրանի ազգային շահերի պաշտպանության վրա։

Հանդիպման ընթացքում քննարկվել են նաև Իրանի և Հայաստանի, ինչպես նաև Իրանի և Բելառուսի միջև առաջիկա համագործակցության համաձայնագրերն ու հուշագրերը՝ դրանց ժամանակին իրականացման նպատակով։

Պատվիրակության կազմում ընդգրկված են Իրանի քաղաքական և տնտեսական բարձր օղակների ներկայացուցիչներ։ Նախագահին Մեհրաբադի օդանավակայանում ուղեկցել են փոխնախագահ Մոհամմադ-Ռեզա Արեֆը, Իրանի առաջնորդի օգնական հոջաթոլիսլամ Մոհսեն Ղոմին և կառավարության մի շարք անդամներ։

Այցի շրջանակում օգոստոսի 19-ին Երևանում տեղի կունենա հայ-իրանական գործարար համաժողով, ինչպես նաև բանակցություններ կանցկացվեն երկկողմ և տարածաշրջանային օրակարգերով։