Հայաստանը ՀԱՊԿ-ից հնարավոր դուրս գալու վերաբերյալ փաստաթղթեր չի ուղարկել. Լավրով

Հայաստանը ՀԱՊԿ-ից հնարավոր դուրս գալու վերաբերյալ փաստաթղթեր չի ուղարկել, հետևաբար այդ հարցը և ՀՀ դուրս գալու հնարավոր հետևանքները ՀԱՊԿ ԱԳ նախարարների խորհրդում չեն քննարկվել: Այս մասին ասել է ՌԴ ԱԳ նախարար Սերգեյ Լավրովը, գրում է ՌԻԱ Նովոստին։

«Ոչ, ՀԱՊԿ-ից Հայաստանի դուրս գալու ընթացակարգը չի քննարկվել, քանի որ համապատասխան հարցում չի ստացվել»,- ասել է Լավրովը ՀԱՊԿ ԱԳ նախարարների խորհրդի նիստից հետո իր ճեպազրույցում՝ պատասխանելով այն հարցին, թե քննարկվե՞լ է նիստում կազմակերպությունից Հայաստանի դուրս գալու կարգը։

«Գուշակություններ անելը դիվանագիտության ավանդույթների մեջ չէ: Ինչպես արդեն ասացի, այո, այսօր հայ նախարարը ներկա չէր հանդիպմանը, բայց Հայաստանից չկա որևէ փաստաթուղթ, որևէ պաշտոնական քայլ, որը դրա անհրաժեշտություն կդարձներ քննարկել դրա հետևանքները», - նշել է նա։