Կենտրոնական բանկը անմիջականորեն մասնակցում է բիզնեսի խլման գործթացի՞ն

Facebook-ի օգտատեր Սամվել Սահակյանը հետևյալ գրառումն է կատարել իր էջում.

«Փաստորեն ՀՀ Կենտրոնական բանկը անմիջականորեն մասնակցում է բիզնեսի խլման գործթացին անձնական բնույթի տեղեկատվությունը անօրինական տրամադրելով այն անհատներին՝ որոնք իրականացնում են բուն գործողությունները, կամ Կենտրոնական Բանկում լրիվ բարդակ է։ Փաստերը կներկայացնենք ԱԱԾ»։

VERELQ-ի հետ զրույցում նա պատմեց այն իրադարձությունների շղթան, որոնք բերել են իր կողմից նման կարծիքի ձևավորման: Պարզվում է, Սահակյանն այսօր այցելել է Կենտրոնական բանկ, որտեղ մի փաստաթուղթ է մուտքագրել՝ վարկային կազմակերպության հետագա գործունեության հետ կապված: Կազմակերպությունը պատկանում է իր ազգականին, նա պարզապես որպես միջնորդ փաստաթուղթը ներկայացրել է բանկ: Քիչ անց Սամվել Սահակյանի հետ կապ է հաստատել անծանոթ մի անձ և առաջարկել հանդիպել, քանի որ «կան փաստաթղթեր, որ պետք է քննարկենք», իսկ երբ Սահակյանը հետաքրքրվել է, թե ի՞նչ հարցով, անծանոթը Սահակյանին է ուղարկել իր՝ Կենտրոնական բանկում գտնվելու փաստը հաստատող տեսագրության լուսանկարները և նշել. «Այս հարցով»:

«Ստացվում է, որ իմ մասին գաղտնի տեղեկատվություն է հավաքագրվում, որին միջնորդում է նաև պետական կառույցը, այսինքն՝ աջակցում բացահայտ հանցագործությանը: Այլ կերպ բացատրել, թե ինչպե՞ս է Կենտրոնական բանկի տեսագրող սարքերով արված տեղեկատվությունը հայտնվել չգիտես ում մոտ ու չգիտես ինչ նպատակներով, դրա հետ մեկտեղ նաև հայտնվել իմ ներկայացրած փաստաթղթի բովանդակությունը հնարավոր չէ»,- ասաց Սահակյանը՝ շեշտելով իր հստակ մտադրությունը բոլոր այս փաստերով ներկայանալ ԱԱԾ:

«Այսքանից հետո ինչպե՞ս չմտածես, որ պետական կառույցը, տվյալ դեպքում Կենտրոնական բանկը, ռեկետչիկների հետ միասին գործ չի անում և քաղաքացիներից բիզնես խլելուն ուղղակիորեն չի մասնակցում.... սա ուղղակի խայտառակություն է»,- նշեց մեր զրուցակիցը՝ ևս մեկ անգամ պնդելով, որ պայքարելու է այդ հանցավոր սխեման բացահայտելու ուղղությամբ:

Նշենք, որ VERELQ-ը փորձեց մեկնաբանություն ստանալ նաև Կենտրոնական բանկից, սակայն հասարակայնության բաժնից ահազանգի էությանը ծանոթանալուց հետո հորդորեցին գրավոր ներկայացնել հարցումը և գրավոր էլ ստանալ պատասխանը: Բայց քանզի այս գործով զբաղվելու է արդեն Ազգային անվտանգության ծառայությունը, ապա համոզված ենք, որ առաջիկայում Կենտրոնական բանկի պատասխանները՝ թե՛ գրավոր, թե՛ բանավոր, բոլորիս հասանելի կդառնան:

Ենթադրելի է, որ Սամվել Սահակյանը միակը չէ, ով նման հանցավոր սխեմայի զոհ է դարձել, սակայն առաջինն է, որ բացահայտ խոսում է այդ մասին: Սպասենք նորանոր բացահայտումների:

Պատրաստեց Լիա Խոջոյանը