Հայաստանն Ադրբեջանին է փոխանցել խաղաղության պայմանագրի նախագծի 10-րդ տարբերակը, և այս տարբերակը ներառում է լիովին համաձայնեցված տեքստ: Այս մասին հայտնել է ՀՀ ԱԳ նախարար Արարատ Միրզոյանը Լյուքսեմբուրգի արտաքին գործերի և արտաքին առևտրի նախարար Քսավիե Բետելի հետ համատեղ մամուլի ասուլիսի ժամանակ՝ հաստատելով, որ կա իրական հնարավորություն կարճ ժամկետում Ադրբեջանի հետ խաղաղության պայմանագիր ստորագրելու: «Կան կետեր, որոնք նախկինում լիովին համաձայնեցվել են, և կան տարբեր հոդվածների հատվածներ, որոնք հաջողվել է համաձայնեցնել: Փաստացի և տեխնիկապես տեքստը լիովին համաձայնեցված է: Եվ սա մեր առաջարկն է՝ ստորագրել այն, ինչ արդեն համաձայնեցվել է», - ասել է Միրզոյանը: Նրա խոսքերով, Երևանը ներկայումս սպասում է Բաքվի արձագանքին: «Հավատում ենք, որ կա իրական հնարավորություն կարճ ժամկետում Ադրբեջանի հետ խաղաղության պայմանագիր ստորագրելու և այդպիսով բացելու կայուն խաղաղության և կայունության էջ ու դարաշրջան Հարավային Կովկասի տարածաշրջանում», - հայտարարել է նա: Միրզոյանը հավելել է, որ Հայաստանի մոտեցումները հայտնի են. «Մենք պատրաստ ենք անմիջապես սկսել հաղորդակցությունների ապաշրջափակման գործընթացը «Խաղաղության խաչմերուկ» նախագծի հայեցակարգում ամրագրված սկզբունքների շրջանակներում»:
