Հայ Առաքելական Եկեղեցու դեմ հարձակումները մտահոգիչ են. Սերգեյ Լավրով

Հայաստանում տիրող իրավիճակը այդ երկրի ներքին գործն է, սակայն Հայ Առաքելական Եկեղեցու դեմ հարձակումները մտահոգիչ են։ Այս մասին լրագրողներին հայտարարել է ՌԴ արտաքին գործերի նախարար Սերգեյ Լավրովը՝ Ղրղզստանում կայացած ՀԱՊԿ ԱԳ նախարարների խորհրդի նիստից հետո։

«Բնականաբար, սա մեր հարևան երկրի ներքին խնդիրն է, բայց, անկեղծ ասած, կանոնական և հազարամյակների պատմություն ունեցող Հայ Առաքելական Եկեղեցու նկատմամբ հարձակումները լուրջ մտահոգություն են առաջացնում։ Եկեղեցին ավանդաբար միշտ եղել է հայկական հասարակության հիմնասյուներից մեկը, և մենք ամենևին չէինք ցանկանա, որ այն անարդարացիորեն ենթարկվեր հարձակումների՝ առանց որևէ լուրջ հիմքի», – ասել է նա։

Լավրովը նաև նշել է, որ Ռուսաստանը շահագրգիռ է, որպեսզի այս կոնֆլիկտը կարգավորվի հնարավորինս արագ՝ Հայաստանի Սահմանադրության հիման վրա՝ հարգելով հավատացյալների, և ընդհանրապես՝ մարդու իրավունքները։

ՌԴ ԱԳ նախարարի այս հայտարարության ֆոնին Հայաստանում շարունակում է աճել մտահոգությունը՝ կապված վերջին օրերին տեղի ունեցած ձերբակալությունների շարքի հետ, որոնք վերաբերում են թե՛ ընդդիմադիրների, և թե՛ հոգևորականների։ Մասնավորապես, կալանավորվել է Բագրատ Սրբազանը՝ «Սրբազան պայքար» շարժման առաջնորդը, ինչպես նաև մի քանի համախոհներ։ Նրանց մեղսագրվում է իշխանության բռնի զավթում նախապատրաստելը։ Ավելի ուշ ձերբակալվել է նաև Միքայել Սրբազանը, որի շուրջ գործը հասարակության մի մասի բուռն արձագանքը և բողոքի ակցիաներ է առաջացրել դատարանի շենքի մոտ։ Ավելի վաղ կալանավորվել էր նաև հայ-ռուս գործարար Սամվել Կարապետյանը, որը հանդես էր եկել իշխանությունների հասցեին հնչեցրած քննադատությամբ։

Ընդդիմադիր ուժերը շարունակաբար արտահայտում են մտահոգություն՝ պնդելով, որ այս գործողություններն ունեն քաղաքական դրդապատճառ։ Իշխանությունները, իրենց հերթին, հայտարարում են, որ քրեական գործերը իրավական հիմք ունեն։