Փորձագետներ. Ինչո՞ւ է բռնությունը Հայաստանում դառնում քաղաքական պայքարի մեթոդ

Ժամը 17.00-ի դրությամբ զինված խումբը դեռ շարունակում է անազատության մեջ պահել ոստիկանության մի քանի ծառայողների՝ պնդելով նախկինում ներկայացված պահանջը: Այս մասին տեղեկացնում է Ազգային անվտանգության ծառայությունը: Իրավիճակը շարունակում է մնալ լարված: Փորձագետների կարծիքով՝ այն, որ նման իրավիճակ կարող է հասունանալ բոլորովին կանխատեսելի էր, սակայն անկանխատեսելի է դրա հանգուցալուծումը:

Բանակցությունների փորձագետ Արթուր Մարտիրոսյանի կարծիքով՝ ոչ բոլոր ճգնաժամային իրավիճակներն են, որտեղ կան պատանդներ, ունենում բանակցային լուծում, բայց միանշանակ է, որ բանակցություններ հարկավոր է վարել այնքան ժամանակ, քանի դեռ սպառված չեն համաձայնության գալու բոլոր հնարավորությունները:

«Իմ 22-ամյա փորձը այս ոլորտում, շփումը օտարերկրյա բանակցողների հետ կասկած չեն թողնում, որ երևանյան հարձակումը հնարավոր է հանգուցալուծել առանց զոհերի: Ուղղակի հարկավոր է ժամանակ և համբերություն»,- նշեց նա:

Քաղաքագետ Ալեքսանդր Իսկանդարյանը պնդում է՝ լիովին տրամաբանական էր սպասել, որ ծայրահեղական հռետորաբանությունը վաղ թե ուշ բերելու է ծայրահեղ գործողությունների ու բռնության: Իսկ նման տրամադրություններ հասարակության շրջանում ակնհայտորեն առկա էին:

«Ենթադրում եմ, որ իրավիճակի հանգուցալուծումը կլինի ոստիկանական ինչ-որ գործողությունների արդյունքում և մեծ հույս ունեմ, որ դա չի բերի արյունահեղության»,- հույս հայտնեց քաղաքագետը: Միաժամանակ նա կարծիք հայտնեց, որ որպես երևույթ իրավիճակը կպահպանվի հետագայում էլ, քանի որ ստեղծված իրավիճակը միայն իրավապահների լուծելիք խնդիրը չէ: Այստեղ հարկավոր են համակարգային գործողություններ, որոնք վերաբերում են քաղաքական և սոցիալական բնույթի լուծումներին:

ՀՀ ԱԱԾ նախկին ղեկավար Դավիթ Շահնազարյանն էլ նշմարում է գլխավոր նպատակը՝ խուսափել արյունահեղությունից և հասնել հանգուցալուծման բանակցությունների ճանապարհով: Նա հորդորում է Պավել Մանուկյանին, Վարուժան Ավետիսյանին ու մյուսներին դադարեցնել գործողությունները, քանի որ դրանք հարված են ոչ թե երկրի իշխանություններին, այլ հայոց պետականությանն ու ժողովրդին:

«Դուք ապացուցեցիք, որ Ժիրայր Սեֆիլյանի ձերբակալությունը հիմնավոր է: Անկախ նրանից, թե ինչ վերաբերմունք ունեք ՀՀ գործող իշխանությունների նկատմամբ, դուք չունեք և չեք ունենա հանրային աջակցություն: Վայր դրեք զենքը, հանձնվեք իրավապահներին և գուցե այդ ժամանակ հանրությունը ավելի մեղմ վերաբերմունք կդրսևորվի ձեր նկատմամբ: Հակառակ պարագայում հետագա արյունահեղության ողջ պատասխանատվությունը կընկնի ձեր և Սեֆիլյանի վրա»,- հայտարարել է Շահնազարյանը:

Իրավապաշտպան Արտակ Կիրակոսյանն էլ նշում է՝ Ժիրայր Սեֆիլյանի ժամն է։ «Կդավաճանի իր տղեքին, թե՞ ոչ։ Որ խիղճ ունի բոլորս գիտենք, բայց խելք ունի՞։ Տղեքի միակ ելքը էս վիճակից պատվով դուրս գալու Սեֆելյանի հրամանին լսելն է։ Կզոհաբերի՞ իր ընկերներին Սեֆիլյանը։ Իշխանությունների համար որպես արյունահեղությունից խուսափելու վերջին տարբերակներից մեկը կարող է լինել Սեֆելյանին փոխանակելը պատանդների հետ, առանց զինյալներն տարածքից բաց թողելու»,- հարց է հնչեցնում նա:

VERELQ-ի փորձագետները միակարծիք են՝ իշխանությունների մեղքով ստեղծված իրավիճակում մարդկանց մնում է երկու բան՝ կամ արտագաղթել, կամ հուսահատվել: «Սա հետևանք է իշխանությունների կողմից վարվող քաղաքականության, երբ ոչնչացվել է ընդդիմությունը, իշխանության վրա ազդելու մեխանիզմներ չկան: Իսկ երբ այդ ամենը չկա, բայց առկա է սոցիալ-տնտեսական մեծ դժգոհություն իշխանություններից, քաղաքական համակարգի հանդեպ վստահության մակարդակը զրո է, մարդկանց այդքան էլ մեծ ընտրություն չի մնում ՝ հուսահատություն կամ արտագաղթ: Իսկ ծայրահեղականներին միայն մեղ ունի՝ ահաբեկչություն»:

Հիշեցնենք, Ժիրայր Սեֆիլյանի մոտ 3 տասնյակ կողմնակիցներ, լուսադեմին «Կռազ» մակնիշի մեքենայով կոտրել են ոստիկանության ՊՊԾ գնդի դարպասները, ներխուժել, կրակոցներ արձակել եւ պատանդ են պահում այնտեղ եղած ոստիկաններին: Փոխհրաձգության ժամանակ զոհվել է մեկ ոստիկան, երկուս՝ վիրավերվել:

Սեֆիլյանի կողմանկիցները պահանջում են ազատ արձակել արմատական ընդդիմադիր քաղաքական գործիչներ Ժիրայր Սեֆիլյանին, Շանթ Հարությունյանին ու Ոլոդյան Ավետիսյանին: Բացի այդ նրանք պահանջում են նախագահ Սերժ Սարգսյանի հրաժարականը:

Տպել

Թեմայի այլ նորություններ
Загрузка...