Աշխատանքի և սոցիալական հարցերի նախարարը հրաժարական է ներկայացրել

Այսօրվանից դադարեցնում եմ պաշտոնավարումս որպես աշխատանքի և սոցիալական հարցերի նախարար։ Այս մասին ասված է Մեսրոպ Առաքելյանի տարածած հայտարարության մեջ:

"Հետպատերազմյան իրավիճակում այս պատասխանատվությունն ստանձնել եմ բացառապես մեկ նպատակով՝ մեր ժողովրդի ուսերից օր առաջ թոթափելու սոցիալական այն արհավիրքը, որին բախվեցինք թշնամու կողմից Արցախի դեմ սանձազերծված պատերազմի հետևանքով։

Այսօր կարող ենք արձանագրել, որ Արցախը հաղթահարել է սոցիալական ճգնաժամը և թևակոխել է զարգացման ծրագրերի և բնակարանաշինության փուլ, ինչի կապակցությամբ հայտնում եմ իմ գոհունակությունը և սոցիալական առաջնային մարտահրավերները համարում բավարար չափով հաղթահարված։

Միևնույն ժամանակ, պատերազմի ընթացքում վիրավորում ստացած մեր եղբայրների առաջնային սոցիալական խնդիրների լուծումը և պրոթեզավորման գործընթացը դրված են բավարար հիմքերի վրա՝ վերջնական արդյունքի հասնելու համար։

Շնորհակալ եմ Հայաստանի և Արցախի իմ գործընկերներին՝ համագործակցության համար։

Խաղաղություն մեր միասնական հայրենիքին",- գրել է Առաքելյանը։

VERELQ-ը հիշեցնում է, որ Առաքելյանը նախարար էր նշանակվել  2020 թվականի նոյեմբերի 20-ին: