ՍԴ-ն հակասահմանադրական ճանաչեց 300.1 հոդվածը, որով մեղադրվում է Ռոբերտ Քոչարյանը

Սահմանադրական դատարանն այսօր՝ մարտի 26-ին, հակասահմանադրական է ճանաչել ՀՀ քրեական օրենսգրքի 300.1-րդ հոդվածը, որով ՀՀ երկրորդ նախագահ Ռոբերտ Քոչարյանը մեղադրվում է «սահմանադրական կարգը տապալելու» մեջ:

«ՀՀ ՍԴ-ն քննելով դիմումները որոշեց ՀՀ Քրեական օրենսգրքի 300.1 հոդվածը ճանաչել սահմանադրության 78-79 հոդվածներին հակասող ու անվավեր: Սահմնանադրության 170-րդ 2-րդ մասի համաձայն սույն որոշումը վերջնական է և ուժի մեջ է մտնումհրապարակման պահից»,-որոշումը ներկայացրեց ՍԴ նախագահ Արման Դիլանյանը:

Նա նաեւ տեղեկացրեց, որ ՍԴ դատավոր Խունդկարյանը սույն գործով հատուկ կարծիք ունի պատճառաբանական մասին վերաբերյալ:

«Աննա Դանիբեկյանը քրեական հետապնդումը 300.1 հոդվածով դադարեցնելու է։ Սահմանադրական դատարանի որոշման ուժով արդեն իսկ բոլոր ակտերը, որոնք վերաբերում են 300.1 հոդվածին, ընդունման պահից ի վեր ուժ չունեն, և ենթակա են վերանայման 2009 թ․ սկսած։ Քրեական օրենսգրքում այլևս 300.1-րդ հոդված չկա, եթե չկա հոդված, չկա հանցանք։ Սա քրեական օրենսգրքի պարզ տրամաբանությունն է»,- լրագրողների հետ զրույցում ասաց Սահմանադրական դատարանում Ռոբերտ Քոչարյանի ներկայացուցիչ Արամ Վարդևանյանը։

Հիշեցնենք, որ Սահմանադրական դատարանում մարտի 23-ին սկսվել էր Ռոբերտ Քոչարյանի եւ Երեւանի ընդհանուր իրավասության դատարանի հայցի քննությունը։