Փաշինյանը կատարեց Ալիևի երազանքը ու խոստումը. Հովհաննիսյան

"Ադրբեջանցի երկու դիվերսանտներին ամենասկզբում հանձնելով՝ փաշինյանը կատարեց ալիեւի երազանքը ու խոստումը, երաշխավորեց գերիների առաջին խմբի վերադարձը ու կասկածի տակ դրեց մյուսներինը",- Facebook-ի իր էջում գրել է ՀՀ արդարադատության նախկին նախարար Արփինե Հովհաննիսյանը:

"Այդ երկու մարդասպանները պիտի մնային մինչեւ վերջին հայ գերիի վերադարձը։ Ալիեւը միայն այդ դեպքում կվերադարձներ մեր տղերքին։

Դավաճան, անխելք.. բայց այսքա՞ն",- գրել է նա։

VERELQ-ը հիշեցնում է, որ դեկտեմբերի 14-ին սկսվել է Հայաստանի և Ադրբեջանի միջև գերիների և պատանդների փոխանակումը «բոլորը բոլորի դիմաց» սկզբունքով: ՀՀ-ից գերիներ և պատանդներ են տեղափոխվել Ադրբեջան, այդ թվում՝ Շահբազ Գուլիևը և Դիլգամ Ասքերովը, որոնք դատապարտվել են Լեռնային Ղարաբաղում սպանություն և դիվերսիա կատարելու համար:

Դիլհամ Ասկերովը և Շահբազ Գուլիևը զինված խմբի կազմում 2014 թվականին ապօրինի կերպով մուտք են գործել Արցախի Հանրապետության տարածք: Հանցավոր խմբի անդամներն իրականացրել են մի շարք ծանր և առանձնապես ծանր հանցագործություններ, որոնց թվում են՝ 17-ամյա Սմբատ Ցականյանի առևանգումը և սպանությունը, 43-ամյա Սարգիս Աբրահամյանի սպանությունը և 37-ամյա Կարինե Դավթյանին ծանր վնասվածքների հասցնումը։ Նրանց նկատմամբ դատական գործընթացը եղել է բաց և իրականացվել է ազգային և միջազգային արդարադատության նորմերին համապատասխան։ Դատական գործընթացի ընթացքում պարզվել է, որ այս հանցավոր խումբը Ադրբեջանի հատուկ ծառայությունների կողմից զինվել և ուղարկվել է Արցախ՝ լրտեսական գործունեություն իրականացնելու նպատակով, որը կասեցվել է Արցախի իրավապահ մարմինների կողմից։

Դիլհամ Ասկերովը դատապարտվել էր ցմահ ազատազրկման, իսկ դիվերսանտ Շահբազ Գուլիև՝ 22 տարի ազատազրկման: