Աբովյան, Կապան, Սյունիք. Հայաստանի համայնքները պահանջում են Փաշինյանի հրաժարականը

Հայաստանի մի շարք համայնքներ պահանջում են Նիկոլ Փաշինյանի հրաժարականը:


Մասնավորապես, համապատասխան հայտարարությամբ հանդես են եկել Սյունիքի մարզի բոլոր  համայնքապետերը։

Հրաժարականի կոչ են տարածել.
• Կապանի համայնքի ղեկավար Գևորգ Փարսյանը և ավագանու անդամները
• Գորիսի համայնքի ղեկավար Առուշ Առուշանյանը և ավագանու անդամները

• Քաջարանի համայնքապետ Մանվել Փարամազյանը և ավագանու անդամները
• Մեղրի համայնքի ղեկավար Մխիթար Զաքարյանը և ավագանու անդամները
• Սիսիանի համայնքի ղեկավար Արթուր Սարգսյանը և ավագանու անդամները

• Տեղ համայնքի ղեկավար Ներսես Շադունցը և ավագանու անդամները
• Տաթև համայնքի ղեկավար Մուրադ Սիմոնյանը ու ավագանու անդամները:


Աբովյան համայնքի ավագանու անդամները՝ նշելով, որ  միանում են բազում ՀՀ քաղաքացիների պահանջին և անվստահություն են հայտնում ներկայիս կառավարության գործունեությանն ու մասնավորապես ՀՀ վարչապետի աշխատանքին:


"Ներկայիս իշխանությունը կորցրել է իր հնարավորությունը՝ կայուն պետություն կառուցելու առումով և օր առաջ պիտի հեռանա",- ասված է հայտարարության մեջ:


Նմանատիպ հայտարարությամբ հանդես է եկել նաև Կապանի քաղաքապետ Գևորգ Փարսյանն ու համայնքի ավագանին.


«Սիրելի՛ հայրենակիցներ,


Հայաստանն ու Արցախը կանգնած են արհավիրքի առաջ, երկիրն աղետի շեմին է, վտանգված է Սյունիքը։ Պատերազմի առաջին օրերից Սյունիքը միասնական կերպով արժանապատիվ կռիվ է տվել ինչպես ճակատում, այնպես էլ՝ թիկունքում։ Այսօր ևս բոլոր համայնքները լուծում են լրջագույն խնդիրներ, որոնց մասին խոսելու առիթներ դեռ կլինեն։ Սյունիքի համար ճակատագրական այս օրերին բազմաթիվ հարցեր շարունակում են մնալ անպատասխան և չլուծված։


Սահմանի հետ կապված մի շարք հարցեր վիճելի են, Սյունիքի փրկության համար վճռորոշ այս փուլում, երբ պետք է ճակատագրական որոշումներ կայացվեն, համայնքներն են շարունակում մնալ անվտանգությունը երաշխավորող հիմնական դերակատարները։ Մենք կորցրել ենք Արցախի զգալի մասը, ունենք հազարավոր զոհեր, անհետ կորածներ, տնտեսական ու հումանիտար բազում խնդիրներ, որոնց լուծման բեռը շարունակում է մնալ համայնքների ուսերին և իրականացվում է պատվով։


Այս ամենի համատեքստում, նույնիսկ ամենափոքր թվացող հարցերը չեն լուծվում պետական մակարդակում, քանի որ կառավարման ամբողջ համակարգն այս օրերին անգործության է մատնված։


Թշնամին հասել է Սյունիքի դարպասները։ Այս պահին մեր գերխնդիրը Սյունիքի պաշտպանությունն է, բնակչության անվտանգության ապահովումը։ Յուրաքանչյուր րոպեն թանկ է և կարող է անդառնալի հետևանքներ ունենալ։ Ստեղծված իրավիճակում ամեն օր էլ ավելի ենք համոզվում, որ այս իշխանության հետ հնարավոր չէ չեզոքացնել մեզ սպառնացող աղետը, ուստի պահանջում ենք վարչապետ Նիկոլ Փաշինյանի և կառավարության հրաժարականը։ Սա քաղաքական շահարկումների խնդիր չէ, այլ հայրենիքի փրկության, Սյունիքի բնակչության անվտանգության ապահովման հարցն է։ Մենք հասկանում ենք, որ վաղը կարող է շատ ուշ լինել, ուստի այս փուլում կարող և նվիրյալ ուժեր են պետք, որոնք պետք է գործեն հանուն Սյունիքի փրկության, երկիրն աղետալի վիճակից հանելու տրամաբանությամբ։ Այսպիսով, պետք է բոլորս ոտքի կանգնենք և ոչ ասենք այս կործանարար իրավիճակին»։


Բացի այս, Փաշինյանի հրաժարականի պահանջով հանդես են եկել նաև Սյունիքի մարզի Մեղրի համայնքի ղեկավար Մխիթար Զաքարյանն ու Մեղրիի համայնքի ավագանու անդամները:


Ավելի վաղ Փաշինյանի հրաժարականի պահանջով հանդես էր եկել Կոտայքի մարզի Քասախ համայնքի ղեկավար Արա Մկրտչյանը:


VERELQ-ը հիշեցնում է, որ քիչ անց Ազատության հրաժարակում կմեկնարկի Նիկոլ Փաշինյանի հրաժարականի պահանջով ընդդիմության հանրահավաքը, որի ընթացքում Վազգեն Մանուկյանը՝ անցումային շրջանի ընդդիմության վարչապետի թեկնծուն, հանդես կգա ելույթով ու կներկայացնի գործողությունների ճանապարհային քարտեզը:


 


 

Տպել

Загрузка...