«Ֆրեսկոյի» շրջանակներում տեղի ունեցավ Ռուբեն Հախվերդյանի 70-ամյակին նվիրված համերգ
Երևանի Աբովյան փողոցի Սբ. Աննա և Սբ. Կաթողիկե եկեղեցիների հարակից տարածքում շարունակվում է «Ֆրեսկո» արդի արվեստի և հոգևոր ֆիլմերի 7-րդ միջազգային փառատոնը, որի շրջանակներում օգոստոսի 29-ին տեղի ունեցավ Ռուբեն Հախվերդյանի 70-ամյակին նվիրված հոբելյանական համերգների շարքից առաջինը։
Համերգի ընթացքում Հախվերդյանի և ընկերների կատարմամբ հնչեցին սիրված և ճանաչված «Հեքիաթ», «Երջանկություն», «Պոետները և շները», «Սպիտակ Աղավնի», «Երևանի գիշերներում» և մի շարք այլ ստեղծագործություններ։ Երգիչ, երգահանն ինքն իր 70-ամյակը նշելու գաղափարի հետ այնքան էլ հաշտ չէ, քանի որ իր խոսքում նշեց, որ չի զգում տարիքը։
![](https://scontent.fevn9-1.fna.fbcdn.net/v/t1.15752-9/118652308_317224752863076_5478683634717638689_n.jpg?_nc_cat=109&_nc_sid=b96e70&_nc_ohc=tWfl-jeVw-oAX8K-9Db&_nc_ht=scontent.fevn9-1.fna&oh=f783490994eccfcc2db64a49d6cbf864&oe=5F71FD8F)
«Հուսո առագաստ» հեղինակային երգի փառատոնի և «Բարդերի ակումբ»-ի գեղարվեստական ղեկավար, երգահան Վախթանգ Հարությունյանի խոսքով՝
հասարակության համար կարևոր դեր խաղացած մարդու՝ Ռուբեն Հախվերդյան երևույթի, 70-ամյակը հարկավոր է ըստ արժանվույն անցկացնել, և այս կապակցությամբ նախատեսված համերգների շարքը կշարունակվի Երևանի տարբեր հատվածներում, ինչու չէ նաև՝ Հայաստանի տարբեր մարզերում։
Հիշեցնենք, որ Փառատոնն իրականացվում է ՀՀ կրթության, գիտության, մշակույթի և սպորտի նախարարության գլխավոր աջակցությամբ, Մայր Աթոռ Սուրբ Էջմիածնի օրհնությամբ և աջակցությամբ և Հայաստանյան «Կլոր սեղան» հիմնադրամի աջակցությամբ՝ Հայաստանի Հանրապետությունում կորոնավիրուսային համավարակի (COVID-19) կանխարգելման և վերահսկման կանոնների պահպանմամբ։