Ռասիզմի նոր դրսևորումներ. ԱԳՆ-ն դատապարտում է Բաքվին

ՀՀ արտաքին գործերի նախարարությունը առարկություններ չունի Բաքվում կայանալիք ֆուտբոլային հանդիպմանը Հենրիխ Մխիթարյանի մասնակցության մասով, եթե Ադրբեջանի կողմից համապատասխան անվտանգության երաշխիքներ տրվեն: Այս մասին ճեպազրույցի ժամանակ ասաց ԱԳՆ մամուլի խոսնակ Աննա Նաղդալյանը։

Նա նշեց, թե ԱԳՆ-ն կողջունի, եթե ադրբեջանական կողմը հավատարիմ լինի այն սկզբունքին, որի մասին հայտարարել էր օրեր առաջ՝ սպորտը վեր է քաղաքականությունից։ 

«Բայց Ադրբեջանի կողմից անվտանգության երաշխիքներ չտրամադրելը և ենթադրյալ հայկական ծագում ունեցող երկրպագուների մուտքի արգելքը ոչ այլ ինչ է, քան ռասիստական դրսևորում։ Դա կասկածի տակ է դնում այդ երկրում միջազգային միջոցառումների անցկացումը։ Այս խաղով Ադրբեջանը հնարավորություն ուներ ցույց տալու, թե որքան է իրապես պատրաստ աշխատելու ժողովուրդներին խաղաղության նախապատրաստելու ուղղությամբ։ Սակայն ականատես եղանք ռասիզմի նոր դրսևուումների։ Բնականաբար, այս հանգամանքը բարձրացվելու է մեր միջազգային գործընկերների առջև»,- շեշտեց ԱԳՆ խոսնակը։