ՀՀ-ԵՄ առեւտրային հարաբերությունների ներուժը բարձր է ներկայիս մակարդակից. Սվիտալսկի

Եվրամիությունը կարեւոր նշանակություն է տալիս Հայաստանի հետ կառուցողական երկխոսությանը: Այս մասին սեպտեմբերի 25-ին Երեւանում կայացած Հայաստան-ԵՄ առեւտրի հարցերով համագործակցության հանձնաժողովի առաջին նիստի ողջույնի խոսքում հայտարարեց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:

Նա նշեց, որ Եվրամիությունը Հայաստանի վաճառահանման համար ամենախոշոր շուկան է՝ լինելով երկրի երկրորդ առեւտրային գործընկերը եւ երկրորդ խոշոր ներդրողը: Սվիտալսկին նշեց, որ Հայաստանի եւ Եվրամիության միջեւ ապրանքաշրջանառության դինամիկան նույնպես ոգեշնչում է, օրինակ, վերջին երեք տարիների ընթացքում GSP + ռեժիմում Հայաստանից դեպի ԵՄ արտահանումը ավելի քան կրկնապատկվել է:

«Աճն ակնհայտ եւ շոշափելի է: Բայց չնայած դրան, Հայաստանի եւ ԵՄ-ի միջեւ առեւտրային հարաբերությունների ներուժը բարձր է ներկայիս մակարդակից եւ ներկայիս նիստն ուղղված է այդ ներուժի առավելագույն օգտագործման հարցերի քննարկմանը», - նշեց դեսպանը:

Նա նաեւ ավելացրեց, որ Հայաստանի եւ Եվրամիության միջեւ առեւտրի ազատականացմանը նպաստում են Համապարփակ եւ ընդլայնված գործընկերության համաձայնագրի (CEPA)՝ երկրի օրենսդրական դաշտի օպտիմալացման, պետական գնումների հնարավորությունների ընդլայնման եւ սպառողների իրավունքների պաշտպանության մասին մի շարք դրույթները:

«Այդ նպատակները կիրականացվեն CEPA-ի համաձայնագրի իրականացման ընթացքում, եւ ԵՄ-ն միայն ողջունում է այդ հարցերի շուրջ համագործակցելու Հայաստանի պատրաստակամությունը», - եզրափակեց ԵՄ պատվիրակության ղեկավարը:

Նշենք, որ Հայաստանի Վիճակագրական կոմիտեի տվյալներով՝ Հայաստանի եւ ԵՄ-ի միջեւ արտաքին առեւտրաշրջանառությունը 2017 թվականի արդյունքներով 1 մլրդ դոլարից անցել է, որ մեկ տարվա վաղեմության ցուցանիշից 36,1 տոկոսով ավելի է: Մասնավորապես՝ արտահանումն աճել է 22 տոկոսով՝ մինչեւ 432,4 մլն դոլար, ներմուծման 47,8 տոկոս աճի պայմաններում՝ մինչեւ 633,3 մլն դոլար: ԵՄ-ն Հայաստանի երկրորդ առեւտրային գործընկերն է, երկրի արտաքին առեւտրաշրջանառության կառուցվածքում նրա բաժինը կազմում է 26 տոկոս: