Հայկ Սարգսյանը մեղադրում է Ալեն Սիմոնյանին VBet-ի շահերը լոբբինգ անելու մեջ

Ազգային ժողովի նախկին պատգամավոր Հայկ Սարգսյանը բացահայտել է խորհրդարանի խոսնակ Ալեն Սիմոնյանի հետ իր հակամարտության իրական դրդապատճառները՝ վերջինիս մեղադրելով VBet բուքմեյքերական ընկերության շահերն առաջ մղելու մեջ։

«Tete A Tete» հաղորդմանը տված ընդարձակ հարցազրույցում Սարգսյանը հայտարարել է, որ դեռևս 2019 թվականին Ալեն Սիմոնյանի հեղինակած օրենսդրական նախաձեռնությունը, որով նախատեսվում էր փակել բուքմեյքերական գրասենյակները, իրականում սպասարկում էր VBet-ի (նախկին Vivaro) բիզնես շահերը։

Ըստ նախկին պատգամավորի՝ խաղադրույքների 86 տոկոսն արվում էր առցանց տիրույթում, ուստի ֆիզիկական գրասենյակների փակումը ոչ թե պայքարում էր խաղամոլության դեմ, այլ խաղացողներին ուղղորդում դեպի առցանց հարթակներ, որտեղ գերիշխող դիրք ուներ վերոնշյալ ընկերությունը։

Անդրադառնալով օրենսդրական գործընթացի ստվերային կողմերին՝ Սարգսյանը նշել է, որ ոլորտի այլ ներկայացուցիչներն իրեն ուղիղ տեղեկացրել են նախագծի ծագման մասին։ «Գալիս էին ու ասում էին, որ այս նախագիծն ուղղորդված է Vivaro-ից... դրա համար այս նախագիծը գրվել է VBet-ում ու Ալեն Սիմոնյանն է բերել»,- ընդգծել է նա՝ հավելելով, որ փաստաթղթային հետքերը նույնպես մատնանշում էին ընկերության ներգրավվածությունը։

Սարգսյանը պնդել է, որ խաղամոլության դեմ իրական պայքարի համար անհրաժեշտ էր սահմանափակել նաև առցանց տիրույթը։ «Եթե մենք խաղամոլության դեմ ենք պայքարում, պետք է նաև օնլայնը փակենք կամ սահմանափակենք գոնե»,- ասել է նա՝ հավելելով, որ Սիմոնյանն իր այս դիրքորոշումը վարչապետ Նիկոլ Փաշինյանին ներկայացրել է խեղաթյուրված ձևով։

Հակամարտությունը նոր թափ է ստացել 2024 թվականին, երբ խաղային ոլորտի շրջանառությունը 300 միլիարդ դրամից հասել է 6,1 տրիլիոնի։ Սարգսյանն առաջարկել է ոլորտի նկատմամբ 10 տոկոս լրացուցիչ հարկ սահմանել, ինչը պետբյուջե կբերեր տարեկան մոտ 70 միլիոն դոլար։

Նրա խոսքով՝ նախագիծը դիմադրության է արժանացել ԱԺ-ում, սակայն ի վերջո արժանացել է կառավարության և վարչապետի հավանությանը։ Դրանից անմիջապես հետո Ալեն Սիմոնյանը նախաձեռնել է Սարգսյանին կուսակցությունից հեռացնելու գործընթացը՝ որպես հիմք օգտագործելով կարգապահական աննշան միջադեպեր։

Սարգսյանը վստահ է, որ իր դեմ սկսված արշավի իրական պատճառը խոշոր առցանց խաղային ընկերություններին հարկային բեռի տակ դնելն էր, որոնք, ըստ նրա, ունեն միլիարդների ռեսուրսներ և ազդեցիկ հովանավորներ կառավարությունում ու խորհրդարանում։