Բյուրեղավանում աղիքային վարակի դեպքեր են գրանցվել. նոր փորձանմուշներ են վերցվում

Սեպտեմբերի 6-ին Բյուրեղավան քաղաքի վեց բնակիչ աղիքային վարակին բնորոշ ախտանշաններով դիմել է բժշկական հաստատություններ, ինչը հերթական անգամ արդիական է դարձրել համայնքում տարածվող պարբերական հիվանդությունների խնդիրը:

Ըստ Հայաստանի առողջապահության նախարարության տրամադրած նախնական տվյալների՝ տուժածներից երեքի վիճակը պահանջել է հոսպիտալացում, և նրանք այժմ բուժում են ստանում ինֆեկցիոն բաժանմունքում: Մյուս երեք քաղաքացիներին ցուցաբերվել է անհրաժեշտ ամբուլատոր օգնություն, և նրանք գտնվում են բժիշկների հսկողության տակ:

Գերատեսչությունից հիշեցնում են, որ խնդրի կանխարգելման նպատակով Հիվանդությունների վերահսկման և կանխարգելման ազգային կենտրոնի (ՀՎԿԱԿ) մասնագետներն օգոստոսի ընթացքում ամենշաբաթյա ռեժիմով ջրի նմուշառումներ են իրականացրել Բյուրեղավանի տարբեր հատվածներում: Այդուհանդերձ, նախորդ ամսվա լաբորատոր հետազոտությունները ջրի որակի որևէ շեղում չէին արձանագրել:

Նոր դեպքերի ի հայտ գալուն պես պատկան մարմինները վերսկսել են համաճարակաբանական ուսումնասիրությունները։ «Այսօր ՀՎԿԱԿ-ի մեր մասնագետները «Վեոլիա ջուր» ՓԲԸ-ի և Առողջապահական և աշխատանքի տեսչական մարմնի հետ համատեղ կրկին կիրականացնեն նմուշառումներ՝ ինչպես բժշկական օգնության դիմած անձանց բնակության, այնպես էլ քաղաքի այլ հասցեներում»,- նշված է նախարարության պաշտոնական հաղորդագրության մեջ:

Համալիր ստուգումների շրջանակներում կիրականացվեն նաև կենսանմուշների հետազոտություններ, որոնց վերջնական արդյունքների և լրացուցիչ տեղեկատվության մասին կհայտնվի ավելի ուշ: Հարկ է ընդգծել, որ իրավիճակը մնում է խնդրահարույց, քանի որ ընթացիկ տարվա կտրվածքով Բյուրեղավանում աղիքային վարակների բռնկումներ արձանագրվում են ոչ առաջին անգամ: