Ռուբեն Վարդանյանի գործն արդեն գրանցվել է ՄԻԵԴ-ում

ՄԻԵԴ-ում հայ գերիների շահերը ներկայացնող իրավապաշտպան Սիրանուշ Սահակյանը հայտարարել է, որ Ռուբեն Վարդանյանի դատավճռի ուսումնասիրությունը բազմաթիվ խախտումներ ու խնդիրներ է բացահայտել, իսկ ամբողջ դատավարությունը չի համապատասխանել արդար դատաքննության չափանիշներին։

Նրա խոսքով՝ դատավարության ընթացքում արձանագրվել են մարդու իրավունքների բազմաթիվ խախտումներ, ինչի պատճառով կայացված դատավճիռը չի կարող լեգիտիմ համարվել։

«Դրա արդյունքը լեգիտիմ չէ, և մենք մեր իրավական փաստարկները ներկայացրել ենք ՄԻԵԴ»,– լրագրողների հետ հանդիպման ժամանակ ասել է Սահակյանը։

Նա տեղեկացրել է, որ Ռուբեն Վարդանյանի գործն արդեն գրանցվել է Մարդու իրավունքների եվրոպական դատարանում և ստացել համապատասխան համար։ Գործը պետք է քննվի ՄԻԵԴ-ի կողմից։

Սահակյանի խոսքով՝ Վարդանյանի գործով կայացված դատավճիռն առանձնանում է նաև իր բովանդակությամբ․ դրանում, ըստ իրավապաշտպանի, խախտվել են ոչ միայն իրավական և բարոյական սկզբունքները, այլև ողջամտության ու առողջ դատողության սահմանները։

ՄԻԵԴ ներկայացված բողոքի հիմքում, ըստ Սահակյանի, հենց այդ խախտումներն ու դատավարության ընթացքում արձանագրված խնդիրներն են։