Ջրի որակի շուրջ բանավեճ Հայաստանում. «Վեոլիա Ջուրը» հերքել է մեղադրանքները

Հայաստանի ջրամատակարարման օպերատոր «Վեոլիա Ջուր» ընկերությունն արձագանքել է խմելու ջրի սանիտարահիգիենիկ նորմերի հնարավոր խախտումների մասին հայտարարություններին։ Հանրային բանավեճի առիթ են դարձել ամռանն արտեզյան ջրերի կիրառման հետևանքով ջրի կոշտության թույլատրելի մակարդակի գերազանցման վերաբերյալ պնդումները։

Ավելի վաղ իրավաբան Արփինե Հովհաննիսյանը հրապարակել էր փորձաքննությունների արդյունքներ, համաձայն որոնց՝ մի շարք բնակավայրերում խմելու ջրի կոշտությունը հասնում կամ գերազանցում է Առողջապահության նախարարության կողմից սահմանված առավելագույն շեմը։ Ըստ նրա հայտարարության՝ ամառային սակավաջրության պայմաններում ընկերությունը խմելու ցանցին է միացնում արտեզյան ջուր, ինչն էլ անմիջականորեն ազդում է սպառողներին հասնող ջրի ցուցանիշների վրա։

Ի պատասխան այս մեղադրանքների՝ «Վեոլիա Ջուր»-ը հավաստիացրել է, որ մատակարարվող ջրի որակը գտնվում է շուրջօրյա լաբորատոր հսկողության ներքո, իսկ խախտումների բացահայտման նպատակով զուգահեռ վերահսկողություն են իրականացնում նաև պետական իրավասու մարմինները: Ընկերությունում հանգամանորեն պարզաբանել են, որ ջրի կոշտությունը պայմանավորված է բացառապես տվյալ աղբյուրների բնական ու երկրաբանական առանձնահատկություններով և որևէ կերպ չի համարվում մարդկանց առողջության համար վտանգ ներկայացնող գործոն։

Օպերատորը նաև ընդգծել է, որ 2027 թվականից ուժի մեջ մտնող նոր կարգավորումների համաձայն՝ այս ֆիզիկաքիմիական ցուցանիշն այլևս չի դիտարկվելու որպես հանրային առողջության ռիսկը բնութագրող գործոն։