Սամվել Ֆարմանյանը ԵԽԽՎ նախագահին համեմատեց ավանակի հետ

571

Պեդրո Ագրամունտը ընտրեց մինչև վերջ իրեն խայտառակելու տարբերակը՝ այսօր առավոտյան չներկայանալով ԵԽԽՎ բյուրոյի նիստին և չներկայացնելով իր հրաժարականը, ինչպես խոստացել էր: Այս մասին հայտարարել է ԵԽԽՎ-ում հայկական պատվիրակության անդամ Սալվել Ֆարմանյանը:


Նրա խոսքով, ստեղծված իրավիճակում, ԵԽԽՎ Բյուրոն ստիպված էր կայացնել նրան դե ֆակտո իմփիչմենթի ենթարկելու ստորացուցիչ և աննախադեպ որոշում: Ֆարմանյանի տեղեկացմամբ, Բյուրոյում այդ որոշմանը կողմ են արտահայտվել բոլոր պատգամավորները՝ թվով 27-ը, իսկ ձեռնպահ են քվեարկել երեք պատգամավոր՝ Իսպանիայից և Ադրբեջանից:


Նշենք, որ Ագրամունտը Իսպանիայից է, իսկ Ադրբեջանի աջակցությունը, թերևս, պայմանավորված է այն բոլոր մութ գործարքներով, որոնցում Ագրամունտին ևս մեղադրում են: Սակայն, ինչպես ավելի վաղ VERELQ-ը տեղեկացրել էր, ԵԽԽՎ նախագահի հրաժարականի պահանջը հասունացրել էր ոչ թե այն հանգամանքը, որ իր անունը բազմաթիվ անգամներ շրջանառվել է կոռուպցիոն սկանդալներում, այլ քանի որ նա մարտին ՌԴ Պետական դումայի պատգամավորների հետ մեկնել էր Սիրիա, թեև ԵԽԽՎ-ն իրեն չէր գործուղել:


«Որպես ստեղծված ամոթալի իրավիճակի իրավական հանգուցալուծում՝ հունիսյան նստաշրջանի առաջին իսկ օրը փոփոխության կենթարկվի ԵԽԽՎ կանոնակարգը և կնախատեսվի հատուկ դրույթ՝ Պեդրո Ագրամունտին արդեն դե յուրե հեռացնելու ԵԽԽՎ նախագահի պաշտոնից, եթե, իհարկե, մինչ այդ նա շարունակի հայտնի կենդանու համառությամբ չներկայացնել իր հրաժարականը: Մինչ այդ, մայիսին Պրահայում տեղի կունենա ԵԽԽՎ ԵԺԿ խմբակցության արտահերթ նիստ՝ քննարկելու այս խայտառակագույն ու աննախադեպ իրավիճակը: Իսկ ԵԺԿ-ն հատուկ նիստ կհրավիրի Բրյուսելում՝ քննարկելու Պեդրո Ագրամունտի ամոթալի վարքագիծը»,- հավելել է Սամվել Ֆարմանյանը:


Ավելի վաղ VERELQտեղեկացրել էր, որ Բյուրոյում արվել է հայտարարություն, որ Ագրամունտն այլևս իրավունք չի ունենա ներկայացնել ԵԽԽՎ-ն, հայտարարություններ անել վեհաժողովի անունից, քանի որ չի կատարել այն, ինչ խոստացել էր՝ հրաժարականի դիմում ներկայացնել և ներկայանալ Բյուրոյի նիստին: Սակայն ԵԽԽՎ-ն չունի որևէ ընթացակարգ, որը նախագահի ետկանչ է ապահովում, հետևաբար Ագրամունտը կմնա այդ պաշտոնում՝ սահմանափակված լիազորություններով. անունով վեհաժողովի նախագահ, լիազորություններով՝ առ ոչինչ:

Տպել

Թեմայի այլ նորություններ
Загрузка...