Հայաստանում կյանքի միջին տևողությունը դարձել է 78,6 տարեկան. Ավանեսյան

Առողջապահական համակարգի մի քանի կարևորագույն ցուցանիշներ կան, որոնք խոսում են այն մասին, թե արդյոք այն բոլոր աշխատանքները, որ անում ենք, արդյունք տալի՞ս են, թե՞ չէ: Ամեկարևորն ու առաջնայինը կյանքի միջին տևողությունն է: Այդ մասին ասուլիսի ժամանակ ասաց առողջապահության նախարար Անահիտ Ավանեսյանը:

Ըստ նախարարի՝ կյանքի միջին տևողության թվերը սովորաբար ամփոփվում են տարվա կեսին, հետևաբար 2025-ի թվերը դեռ չկան, իսկ 2024-ի արդյունքների համաձայն՝ Հայաստանում կյանքի միջին տևողությունը երկարել է:

«Հայաստանում կյանքի միջին տևողությունը դարձել է 78,6 տարեկան, որն արձանագրված ամենաբարձր ցուցանիշն է, և սա է մեր կարևորագույն ձեռքբերումը»,- ասաց նախարարը:

Հաջորդը մայրական մահացության ցուցանիշն է, որը, ըստ Անահիտ Ավանեսյանի, ցույց է տալիս, թե արդյոք առողջապահական մեխանիզմները տեղի՞ն են:

«Այս առումով 2025 թվականն առանձնակի տարի է, որովհետև այս մասով մենք ունեցել ենք 1 դեպք, կորուստ, և սա էլ չլսված ցուցանիշ է, և մենք պիտի մեր ջանքերը շարունակենք կենտրոնացնել՝ ապահովելու այս դրական իրավիճակի պահպանումը»,- ասաց նա: